Ayera diaranzon 3 di Juli tabata net un aña pasa cu e noticia tristo a drenta den oranan di mainta cu popular Ruben Trapenberg a fayece. Ayera conmemorando e fecha aki gerencia di Hits100FM caminda Ruben tabata presenta e noticiero di merdia Awe Merdia pa casi un decada, a haci un homenahe special dedicando nomber di nan studio principal na Ruben. Sra Marian Trapenberg Hernandez hunto cu director di Hits100FM Sr. Aldrich Croes a devela e plakaat cu ta duna e studio e nomber; Ruben Trapenberg Newsroom Studio.
Presente tambe na ocacion special aki tabata ruman muhernan di Ruben Trapenberg esta Monique y Lisa Trapenberg y rumanan di Sra Marian esta Marlene y Irene Hernandez. Un ramo di flor special a ser entrega na Dilma Arends Geerman kende den momentonan dificil di enfermedad y despues di fayecimento di Ruben a tuma over e noticiero pa un periodo. Awe Elsa Krozendijk a tuma e encargo di e noticiero “AWE MERDIA” cu Ruben a establece como un di e noticieronan mas serio y alcaso den oranan di merdia. Lelicia Tromp directora di noticia di Telearuba tambe tabata invita ya cu el a traha hopi aña hunto cu Ruben. Presente tambe tabata Sr. Hilario Doncker, Reno Irausquin, coleganan di ECA N.V. y online Mariano Heyden kende a manda su palabranan di apoyo for di Corsou na famia di Ruben y e team di Hits100FM pa cu e dedicacion special.