CARTAGENA DE INDIAS, Colombia – Gobierno di Colombia y FARC a firma e historico acuerdo final tras cuater aña di negociacion na Havana pa pone fin na un conflicto di 52 aña.
Presidente Juan Manuel Santos y “Timochenko”, hefe maximo di FARC, a firma e documento cu un “baligrafo”, un simbolo di e proceso di paz.
Santos: Mi ta prefera un acuerdo imperfecto cut a salba bida
“Loke nos ta firma awe ta un declaracion di e pueblo Colombiano dilanti mundo cu nos a cansa di guera,” e mandatario a bisa den un discurso emotivo, caminda cu el a papia bao di lagrima y a reitera cu na mundo awo tin un guera menos.
“Loke nos a firma awe ta mas cu e acuerdo entre un Gobierno y un guerilla.”
E mandatario a rindi homenahe na e militar y polisnan pa defende e pais y a enfatisa su homenahe na e victimanan, kendenan tabata den centro di e proceso. “Mi kier rindi homenahe na e miyones di victimanan inocente.”
“Ami, kende tabata su impecabel adversario, ta reconoce cu tabata negociadornan digno na mesa di conversacion,” presidente Santos, kende tabata minister di Defensa.
“Cambia arma pa voto; arma pa idea, ta e decision cu mas curashi y mas inteligente cu por wordo tuma.”
Santos a señala cu na momento di firma e acuerdo cu FARC, Colombia ta bisa, manera den su himno: “El bien germina ya! La paz germina ya!”
E presidente, emociona, a conclui cu un otro pasashi di e himno: “Ceso la horrible noche!”
Timochenko: “Den nomber di FARC mi ta ofrece sinceramente perdon na tur e victimanan di e conflicto”
“Pa ningun hende duda cu nos ta bya pa un politica sin arma,” Timochenko a bisa. “Cu e acuerdo aki nos ta aspira pa pone un punto final na Colombia den su historia largo di lucha y enfrentamento.”
E lider insurgente a centra su discurso na e desigualdad na Colombia y pa prome biaha a haci un pedido di pordon cla y publico.
“E sociedad Colombiano tin cu ta claramente inclusivo den lo economico, politico, social y cultural, el a bisa, y a agrega cu “Colombia ta rekeri transformacionnan profundo pa haci real e soñonan di husticia social.”
“Pa reconoce cu FARC semper ta purba di evita e desgracianan di un enfrentamento na Colombia,” e comandante guerillero a bisa, kende a elogia Hugo Chavez, Fidel Castro y “Alfonso Cano”, e hefe abati di FARC.
E fin di un extenso conflicto violento
E conflicto na Colombia cu FARc a dura mas di cinco decada. Ta calcula cu 220 mil persona a fayece y mas di cinco miyon a wordo desplasa.
Diestres hefe di Estado a asisti na e ceremonia, incluyendo lidernan di Mexico, El Salvador, Argentina, Venezuela, Uruguay, Cuba. Tambe a asisti e secretario general di Nacionnan Uni.
“Awe e Colombianonan ta bisa ayo na decadanan di vlam y ta manda un luz di speransa,” Ban Ki-moon, secretario general di Nacionnan Uni, a bisa.
E acuerdo ainda tin cu wordo ratifica pa e Colombianonan den un referendum dia 2 di October proximo.
Fuente: CNN en Español