Tradicion di Thanksgiving
Den hopi hogar Mericano, e celebracion di Thanksgiving a perde hopi di su significado religioso; na su luga e ta concentra ariba e cushinamento y comparti un cuminda generosamente cu famia y amistadnan. Calacuna, un elemento basico asina ominpresente a bira un sinonimo di e dia festivo, pero por tabata of no, ariba e ofrenda di parti di e Pilgrimnan na 1621. Awendia, casi 90% di e Mericanonan ta come e parha, sea ta hasa, of horna, riba Thanksgiving, segun e National Turkey Federation. Otro plato tradicional ta inclui relleno, batata machica, cranberry saus y bolo di pampuna. Boluntarismo ta comun riba Thanksgiving, y comunidadnan hopi biaha ta tene bakesale y ta ofrece cenanan gratis pa esunnan menos afortuna.
PARADA
Parada tambe a bira un parti integral di e dia festivo den ciudad y pueblonan rond Merca. Presenta pa e tienda Macy’s desde 1924, e parada di Thanksgiving na New York ta esun mas grandi y mas famoso, atrayendo di 2 pa 3 miyon espectador ariba e ruta di 2.5 miya y ta hala un audiencia televisivo enorme. E ta presenta marching band, artista, carosanan cu ta transmiti varios celebridad y ballonnan gigante den forma di figuranan di caricatura.
Na comienso di siglo 20 y kisas mas prome cu esey, presidente di Merca a “pordona” un of dos calacuna di Thanksgiving tur aña, scapando e parha di wordo mata y ta wordo mand’e pa un hacienda pa su retiro. Un gran cantidad di gobernadornan Mericano tambe ta efecta e ritual anual di pordon di calacuna.
Controversia di Thanksgiving
Pa algun experto, ainda ta dudoso si di berdad e bankete na Plymouth tabata e prome celebracion di Thanksgiving na Merca. Mas cu claro, historiadonan a registra otro ceremonianan di gratitud bou di colonisadornan Europeo na Norteamerica proem cu e celebracion di e Pilgrimnan. Na 1565 por ehempel, e explorador Spaño Pedro Menéndez de Avilé a invita miembronan di e tribu local Timucua pa un comemento na St. Augustine, Florida, despues di un servicio eclesiastico pa duna Dios danki pa nan yegada safe, di dje y su tripulacion. Dia 4 di december, 1619, or cu 38 colonisador Britanico a yega e luga conoci como oriya di James River na Virginia, nan a lesa un proclamacion designando e fecha como “un dia di duna Dios Todopoderoso danki:.
Algun Nativo Americano y otronan tin problema di con e storia di Thanksgiving ta wordo presenta na e publico Mericano, y specialmente na muchanan di scol. Den nan punto di bista, e narativo tradicional ta pinta un scenario buntia pero engañoso di e relacion entre e Pilgrimnan y e tribu Wampanoag, tapando e historia largo y sangriento di e conflicto entre e Nativo Americanonan y colonisadornan Europeo cu a resulta den e morto di miyones di persona. Desde 1970, manifestantenan ta reuni ariba e dia aki riba e top di e cero Cole’s Hill, cu bista ariba Plymouth Rock, pa conmemora e “National Day of Mourning.” Eventonan similar ta wordo teni na otro partinan di e pais.
Origen antiguo di Thanksgiving
A pesar di cu e concepto di Thanksgiving a desaroya den e colonianan di New England, su rais ta bay bek te na e otro banda di Atlantico. Tanto e Separatistanan como esunnan cu a bin den e Mayflower y e Puritanonan cu a bin despues a trece cu nan un sin fin di tradicionnan di dianan di fiesta, dianan di ayuno durante dianan dificil of esencial, como tambe dianan di bankete y celebracion pa duna Dios danki den temponan di abundancia.
Como un celebracion anual di cosecha y su recompensa, mas ainda, Thanksgiving ta cay bou di un categoria di festivalnan cu ta abarca cultura, continente y milenio. Den temponan antiguo, e Egipcio, Griego y Romanonan tabata tene banketenan y a duna tributo na nan diosnan despues di e cosecha di otoño.
Thanksgiving tambe tin algun semehansa cu e fiesta di cosecha Hudiu di Sukkot. Finalmente, historiadonan a tuma nota cu e Nativo Americanonan tabata tin un tradicion rico pa conmemora e cosecha di otoño cu bankete y diversion hopi prome cu Europeonan a pone pia riba nan territorio.
https://www.history.com/topics/thanksgiving/history-of-thanksgiving