Thanksgiving Day ta un dia festivo na Merca y e ta wordo celebra e di cuater diahuebs di luna di november.
HISTORIA
Na 1621, e colonisadonan (migrantenan) Plymouth y e Indjannan Wampanoag a comparti un cosecha di Otoño (Herfst) cual te dia di awe ta wordo cataloga como e prome celebracion di Thanksgiving den e colonianan. Pa mas di 2 siglo, Thanksgiving tabata wordo celebra pa colonia y estadonan individual. No tabata te na 1863, den pleno Guera Civil, cu presidente Abraham Lincoln a proclama Thanksgiving Day como un dia nacional, pa wordo celebra tur aña na november.
Na september 1620, un barco chikito yama Mayflower a sali for di Plymouth, Inglatera, cu 102 pasahero abordo, un grupo di separatistanan religioso buscando un hogar nobo unda cu nan tabata por tabata tin libertad di practica nan religion y otro individuonan, atrae pa e promesa di prosperidad y propiedadnan den e Mundo Nobo. Despues di un biahe traicionero y inconfortabel cu a dura 66 dia, nan a hancra cerca di Cape Cod, hopi mas noord di nan intencion di desembarca den e Hudson River. Un luna despues, e Mayflower a crusa e Bahia di Massachussets, unda cu e Pilgrimnan, manera nan ta conoci comunmente, a cuminsa cu e trabaonan di establece un pueblo na Plymouth.
Bo tabata sa? Lobster, cacho di awa y pato tabata riba e menu di e Pilgrimnan
Durante e prome winter duro, mayoria di e colonisadonan a keda ariba e barco, caminda cu nan a sufri di diferente malesanan, entre cual varios contagioso. Unicamente mita di e pasaheronan y personal original di e Mayflower a biba pa wak nan prome Primavera na New England. Na Maart , e resto di e colonisadonan a subi tera, unda cu nan a ricibi bishita inusual di un Indjan Abenaki, cu a saluda nan den Ingles. Algun dia despues el a bolbe cu un otro Nativo Americano, Squanto, un miembro di e tribu Pawtuxet cu a wordo secuestra pa un capitan Ingles y bendi como esclavo, pa despues e huy pa Londres y bolbe su tera bek den un expedicion di exploracion. Squanto a siña e Pilgrimnan, zwak door di malnutricion y malesa, con pa cultiva maishi, con pa saca e juice for di e Maple Tree, con pa pisca y pa evita matanan venenoso. Tambe el a yuda e colonisadonan pa cera un aliansa cu e tribu Wampanoag, cual a dura pa mas di 50 aña y tragicamente, ta keda un di e poco ehempelnan di harmonia entre colonisadonan Europeo y Nativo Americanonan.
Na november 1621, despues di e prome cosecha di e Pilgrimnan a resulta exitoso, gobernador William Bradford a organisa un banket festivo y a invita un grupo di aliadonan Nativo Americano di e colonia nobato, incluyendo e hefe di tribu Wampanoag, Massasoit. Esaki ta wordo recorda como e prome Thanksgiving, a pesar di cu e Pilgrimnan no a uza e termino aki e tempo ey. E fiesta a dura 3 dia. Mientras cu no ta existi record di e menu exacto di e bankete historico aki, e historiado di e Pilgrimnan, Edward Winslor, a skirbi den su diario cu gobernador Bradford a manda cuater homber riba un cazeria, den preparacion pa e evento y cu e invitadonan Wampanoag a yega e fiesta cu cuater hert.
Historiadonan a sugeri cu hopi di e cumindanan sirbi e anochi aki a wordo cushina cu metodonan tradicional Nativo Americano. Door cu e Pilgrimnan no tabata tin forno y e stock di sucu a baha considerablemente pa Otoño 1621, e bankete no tabata tin bolo of otro postrenan, cual a bira un seyo di identidad pa celebracionnan contemporaneo.
THANKSGIVING A BIRA DIA FESTIVO OFICIAL
E Pilgrimnan a tene nan di dos celebracion di Thanksgiving na 1623 pa marca e final di un secura largo cu a menasa di cosecha di e aña ey y a pone cu gobernador Bradford a tene un ayuno religioso. Dianan di ayuno y duna danki riba un base anual of ocasional a bira un practica comun entre e colonisadonan na New England.
Durante e Revolucion Americano, e Congreso Continental a designa un of mas dia di duna danki pa aña, y na 1789 George Washington a proclama e prome Thanksgiving na nivel gubernamental di Merca, y el a haci un yamada na e Mericanonan pa expresa nan gratitud pa e final feliz di e Guera di Independencia y e ratificacion exitoso di e Constitucion Mericano. Su sucesornan John Adams y James Madison tambe a designa dianan di duna danki durante nan presidencia.
Na 1817, New York a bira e prome di hopi estado pa oficialmente adopta un Thanksgiving anual festivo, cada un celebra ariba un dia diferente. E parti zuid sin embargo no tabata mucho familiar cu e tradicion. Na 1827, e editor y escritor Sarah Josepha Hale, autor di e.o. di e cantica di mucha “Mary Had a Little Lamb”, a lansa un campaña pa establece Thanksgiving como un dia nacional.
Pa 36 aña el a publica varios editorial y a manda varios carta na gobernador, Senador, presidente y otro politiconan. Porfin na 1863, Abraham Lincoln a bay di acuerdo cu su peticion na e cumbre di e Guera Civil, y den un proclamacion roga Mericanonan pa pidi Dios pa “encomenda su cuido na tur esunnan cu a bira viuda, huerfano, esunnan cu a keda atras of tur esunnan cu ta sufri den e lamentabel guera civil aki” y pa “cura e herida di e nacion”. El a pone Thanksgiving ariba e ultimo diahuebs di November y esaki a wordo celebra asina te cu 1939, ora cu Franklin D. Roosevelt a hala e dia festivo pa un siman delanta pa asina pa yuda benta nan durante e Gran Depresion. E plan di Roosevelt, conoci como Franksgiving, a wordo ricibi cu’n oposicion apasiona di parti di e pueblo Mericano y na 1941, e presidente, di mala gana a firma un decreto proclamando asina e di cuater diahuebs di november como Thanksgiving Day.