SV Britannia a cuminsa den e prome añanan di decada 1950 ora cu grupo di hobennan tabata hunga futbol den cualkier tereno habri cu nan por hanja den bicindario di Piedra Plat y pueblonan rond. Tabata tin diferente gruponan chikito no organisa cu tabata hunga contra otro den bicindario manera; Buchi Jan Boys, Tamarijn Boys, Bonny Boys, Chela Boys y algun mas.
Na augustus 1957 e prome reunion a tuma luga den cas di Sra. Mama Chuchu (Johana Sofia) Croes Lampe na Piedra Plat # 69 unda cu 19 hoben tabata presente y unda un comision a wordo instala bou encargo di Sr. Ripoldo Croes como lider cu e unico meta pa cuminsa cu e procedura pa organisa un team di futbol oficial pa e hubentud di Piedra Plat y bicindario manera; Hooiberg, Pavia, Rooi Afo, Cascogne, Seroe Lopes, Seroe Pita, Casibari, Paradera (Parcialmente), Tamarijn, Bloemond y Seroe Preto.
Den e reunion aki e colonan di SV Britannia (Probablemente Fechi Bareño) a wordo scogi cualnan ta colornan geel cu cora y mas despues a bin agrega blou aserca. E nomber Britannia a wordo scogi pa Americo (Merco) Croes. E nomber Britannia a wordo scogi pasobra den e tempo aya hopi team di fubol tabata wordo yama na nomber di paisnan cu ta popular den futbol, manera Holandia, Jong Holland (Curacao), Jong Colombia y Jong Aruba. E nomber Britannia ta deriva for di Great Britain cual pais tambe ta sumamente popular den futbol.
Na mes un momento e futuro hungadonan di SV Britannia a cuminsa limpia un pida tereno cu a wordo duna door di Sra. Martilia Croes pa e team di futbol di Piedra Plat y bicindario.
Dia 12 oktober 1958 S.V. Britannia a wordo oficialmente funda, y publica pa gobernador interino
Mr. W.G. Boomgaart. SV Britannia ta oficialmente situa na Piedra Plat Aruba y un di e metanan mas importante ta di promove tur clase di deporte den bicindario. SV Britannia ta consisti di miembronan di Honor, Donantenan, Miembronan activo, Miembronan pasivo y junioren.
E prome miembronan di directiva SV Britannia a wordo instala 12 oktober 1958 y nan tabata;
Presidente; Daniel V. (Vale) Croes, Vice Presidente: Henry (Henriche) Croes, Secretario: Ripoldo Croes, 2nd Secretario: Roland W. (Rolly) Bareño, Tesorero: Alfredo (Fechi) Bareño, 2nd tesorero: Serapio (Jati) Weller, Comisarionan; Joaquin Werleman, Hipolito A. (Poli) Pereira, Marcolino (Cholin) Erasmus.
Presidentenan di SV Britannia 1958 – 2018; Sr. Vale Croes, Juan Henriquez, John Croes, Sixto (Buchi) Feliciano, Rudolf Geerman, Glen Roy Tromp, Ronny Henriquez, Sixto (Titichi) Croes, Marlon Werleman, Eddie Berg, Anthony Jansen y Cedric Werleman.
Britannia a hunga su prome wega como miembro di A.V.B. dia 4 di April 1959 den e Knockout di B-Klasse pa e Koningin Juliana Beker. Britannia a gana Estudiantes 3 – 1 y despues di tres victoria mas a yega final contra Mariniers cu tawata e equipo di militarnan Hulandes staciona na Sabaneta. Esaki Britannia a perde 3 – 2 y a keda como sub-campeon. E Juniorennan a wordo elimina den nan prome wega contra Dakota Jr. Britannia a hunga su prome wega di e campeonato oficial di A.V.B. dia 16 di Mei 1959 riba su tereno na Piedra Plat contra e mesun Estudiantes. E biaha aki si Estudiantes a gana 4 – 1 pero Britannia a protesta e wega y a gana esaki pasobra Estudiantes a usa un hungado ilegal. Dia 6 di Juni 1959 Britannia a logra su prome victoria derotando De West 6 – 0 den Sport Centrum Noord cu actualmente ta C.D. Frans Figaroa.
Diahuebs 25 october SV Britannia lo tin un Misa special pa recorda e fecha historico aki y unda despues lo tin un acto protocolario. Nos ta felicita tur ex hungado, ex miembro di directiva, ex miembronan comision di Damas y ex miembronan di diferente comisionnan y e actual miembronan di comision, directiva y coachnan cu ta e haci e celebracion di 60 aña di SV Britannia posibel.