Cada isla den Caribe tin nan mesun signature cocktail di rum punch. Na Aruba, indiscutiblemente e ta e Aruba Ariba, y tur bartender di nos isla ta di acuerdo cu e la wordo inventa na Carib, The Aruba Caribbean Resort, den añanan 60 y cu e receta ta inclui vodka y rum 151, mesa cu Crème de Banana y cu un tiki Coecoei pa e sabor, un liquer traha di e juice di mata di agave, cu ta solamente obtenibel na Aruba.
E mescla di juice di apelsina, cranberry y di anasa ta loke ta hasi e bebida atractivo, mientras cu e Coecoei ta dune su forsa, ya cu e tin un contenido di 100% alcohol. E stropi di cherry grenadine of e Triple Sec ta opcionnan alternativo popular, e Maraschino cherry ta un “must”.
Mientras cu nos tur ta di acuerdo unda e cocktail a wordo crea, e nomber di e mixologo regularmente ta wordo lubida. Sin membargo, awo e ta oficial, e credito mester wordo duna na Juan “Jocky” Tromp, y recientemente Hilton Aruba Caribbean Resort & Casino tabatin e placer di invita e y su famia pa un cena na Sunset Grille.
Mixologo Tromp e tempo ey tabata traha como un “bar-back” na Bali Bar ora cu e la inventa e cocktail Aruba Ariba – e ta corda cu tabata riba 1 di juli 1963. E bebida originalmente tabata yama Ariba Aruba, pero awendia e ta mas conoci como Aruba Ariba.
Tromp ainda tin su receta original riba un pida papel cu tur e ingredientenan skibi, cual e ta balora masha hopi.
Como invitado di honor e anochi ey, Hilton Aruba Caribbean Resort & Casino a otorga Tromp un Certificado di Reconocimento, celebrando e di 55 aniversario di e cocktail mas popular. Esaki a wordo brinda cu orguyo cu un Aruba Ariba.
E anochi tabata un oportunidad excelente pa e veteranonan y esunnan nobo por socialisa cu otro, ya cu algun di e miembronan actual di e ekipo ta corda di a traha cu Tromp temponan aya.
Tromp ta un taxista na e momento aki, y otro aña e lo celebra 60 aña den hospitalidad y turismo. E ta corda di a cuminsa den e industria na 1959, e aña caminda tur cos a cuminsa, esey ta e mesun aña cu nan a inaugura Aruba Caribbean Hotel.
E cocktail Aruba Ariba ta un signature cocktail na Hilton Aruba Caribbean Resort & Casino. Hopi bishitante ta pidi pa e receta y ta bai trahe ora nan bai bek nan pais, treciendo grato recuerdo di nan vacacion den solo.
E bishitantenan hopi biaha ta bisa cu e Coecoei, cu por wordo cumpra akinan solamente, por wordo reemplasa pa un mescla di rom y grenadine, pero nunca e ta mesun cos…solamente na Aruba e ta sali perfecto!
Amantenan di e bebida, tene cuidao, maske cu e cocktail ta refrescante y dushi, e ta un intoxicacion placentero!