Pa e ultimo 18 lunanan, e Hilton Aruba Caribbean Resort & Casino a pasa door di renobacionnan multi-miyonario extensivo, renobando tur aspecto, for di su cambernan y suites, te cu su restaurant, areanan comun y e hardinnan tropical. Pa celebra e terminacion di e renobacionnan, e resort a tene un ceremonia special y desvelo e siman aki.
E ceremonia di reapertura di e resort a wordo teni den e lobby recien renoba di e Gran Dama, den presencia di e isla su Gobernador, Fredis Refunjol y su esposa, e Minister di Turismo Mike de Meza, como tambe otro ministernan gubernamental, miembronan di Parlamento, miembronan di prensa, e partnernan di e Aruba Growth Fund, representantenan di Hilton Worldwide y hopi di e 414 miembronan di ekipo di e resort.
E invitado di honor special na e ceremonia tabata Oscar Henriquez, kende tabata entre esnan cu a concebi e hotel na e prome instante.
Como e isla su prome Comisario di Turismo na 1955, Henriquez a raporta na e Minister di Finansas Juancho Irausquin, su partner den e decision pa introduci turismo na Aruba, den forma di un hotel di luho di cinco streya, diseña pa e arkitecto Mericano mundialmente famoso, Morris Lapidus.
Na edad di 90 aña, Henriquez a tabata honra hunto cu e Gobernador pa oficialmente corta e cinta y declara e resort habri, net na ora pa e temporada halto di 2017.
E artista local Etty Toppenberg a entretene durante e prome parti di e recepcion cu a tuma luga den oranan di mainta, y despues, su Excelencia e Gobernador di nos isla a yega y e ceremonia oficial a cuminsa cu e cantamento di nos isla su himno nacional door di Roderick Franken.
Rene Kan, representando e Aruba Growth Fund a dirigi su mes na e invitadonan, rindiendo homenahe den su discurso na e isla su pioneronan di turismo, y na e architecto di e hotel. Tambe el a gradici su partnernan di negoshi y inversionistanan, incluyendo anecdotanan personal na varios momento durante su discurso. El a reitera e compromiso solido di termino largo di su compania na e proyecto y a pidi pa e confiansa di e miembronan di ekipo na e hotel. “Laga e ultimo aña aki ta e prome aña cu nos a inverti den bo confiansa pa fomenta nos reputacion; ami y e otro doñonan y gerencia lo traha tur dia pa crea un reputacion di confiansa cu cada un di boso,” el a declara.
David Keys y e Minister di Turismo tambe a dirigi nan mes na esnan presente, dunando nan perspectivanan respectivo pa loke ta e renobacionnan di e resort y e futuro di turismo na Aruba.
Despues di esaki e ceremonia di corta e cinta a tuma luga, cu seis dignitario clave arma cu sker, esta Oscar Henriquez, e Gobernador di Aruba, Rene Kan y Justus Martens di e Aruba Growth Fund, e Minister di Turismo y David Keys, VP di Benta y Mercadeo pa e Americas, Hilton Worldwide, concluyendo na un manera simbolico e parti oficial di e mainta.
Un fiesta di cocktail a sigui na Sunset Grille Restaurant, sirbiendo tur specialidad di e resort su restaurantnan. Tournan personal di e propiedad, pa wak e cambernan recien renoba, a wordo acompaña pa e gerente general di e hotel Olivier Maumaire y su ekipo.
Ora e Aruba Growth Fund a cumpra e hotel riba dia 15 di Juli, 2015, e organisacion a duna e resort e nomber y marca nobo di Hilton Aruba Caribbean Resort & Casino, y durante e ultimo aña y mey a pasa door di renobacion, cumprando muebles y acesorionan nobo, y remodelando e cambernan, gangnan, areanan comun y areanan di come, e areanan di piscina y playa, hardinnan, etc.
Awendia e ta e resort mas drecha riba e isla.
Durante e makeover extensivo, e doñonan kier a celebra e hotel su historia fantastico, y a dicidi pa tene un competencia pa hende local y turista, puntrando nan pa manda nan miho portretnan di e hotel for di e añanan 50 y 60. E portretnan ganador a wordo engrandeci y awo ta colga den e lobby, liftnan, gangnan y e 357 cambernan y suitenan.
Den su vision pa e resort, Rene Kan a declara: “Mi ta hopi anima pa wak e futuro di e hotel aki. Mi ta mira un resort cu ta e top destinacion di viahe na Aruba. Mi ta mira un luga unda nos coleganan ta bin traha y ta sali tur dia cu un sonrisa riba nan cara. Mi ta mira un hotel cual tin un luga den historia cu no por wordo lubida pero cu tin un futuro cu ta un parti integral di nos cas riba e isla.”
El a conclui su presentacion positivo na nomber di su partnernan Justus Martens y Milton Berlinski, y a gradici tur hende cu a pone nan confiansa den e ekipo di doñonan, primintiendo pa traha hunto pa crea un bunita experiencia pa cualkier persona cu ta bishita e resort y e isla fantastico di Aruba.