E 16 dia di activismo contra violencia basa den genero ta un campaña internacional cu ta inicia di 25 di November, cual ta e dia internacional pa eliminacion di violencia contra hende muher. E campaña ta continua te cu 10 di December (dia di Derechonan Humano). E tema di e aña aki ta Unite!! Activismo pa elimina violencia contra hende muher.
HIAS Aruba conhuntamente cu agencianan di Nacionan Uni y NGO’s local di Aruba cualnan ta envolvi cu prevencion y respuesta na violencia basa den genero lo bin hunto durante e 16 dianan di activismo pa trece concientizacion tocante violencia contra hende/mucha muher.
Artista Keren Goldstein a crea un proyecto nombra “she’s gone”, (https://www.shesgone.org), caminda vestuarionan di hende muhernan cu a ser asesina/mata como consecuencia directo di violencia basa den genero lo keda exponi. Aruba no ta un excepcion di casonan di GBV, y atravez di e añanan tin un aumento considerabel di victimanan di GBV. Globalmente, data ta mustra cu 1 den 3 hende muher ta victima di GBV. She’s Gone a recorre varios pais pa trece concientizacion y visibilidad di e topico aki. Nos ta spera cu atravez di proyectonan manera esaki, nos por sensibiliza y concientiza Aruba tokante violencia contra hende muher y pa pone un fin na esaki.
