MINNESOTA, Merca- Un hues di Minnesota a determina cu e seis rumannan di e cantante di pop Mericano, Prince lo ricibi su gran fortuna, despues di mas di un aña despues di e fayecimento di e artista door di un sobredosis accidental. Esaki ta segun documentonan hudicial divulga na prensa.
Ruman muhe di Prince, Tyka Nelson, y sus mita rumannan Omarr Baker, Alfred Jackson, Sharon Nelson, Norrine Nelson y John Nelson a wordo designa como herederonan di e musico door di e hues di e condado di Carver, Kevin Eide.
Prince a fayece na edad di 57 aña di un sobredosis di calmante na April 2016, den su compleho Paisley Park Studios den e suburbio di Chanhassen, Mineapolis.
Prince, creado di exitonan manera “Purple Rain” y “When Doves Cry”, no a laga un testament atras, cual a provoca un bataya legal largo tocante e herencia. Decena di personanan a reclama e parti di e testamento.
E balor exacto di e patrimonio di Prince no ta cla pero ta kere cu cientos di miyon di dollar. E cantante a laga atras 25 miyon dollar na propiedad so, segun un inventario recompila despues di su morto pa un compania di manehonan di activonan.
E bienes di Prince no lo wordo distribui na su heredoronan sin un ordo hudicial. Si un Corte di Apelacion dicidi cu algun di e personanan bisa di tin derecho ariba e herencia y a wordo rechasa, hudicialmente nan por tin rason, y un hues lo considera esaki, segun documentonan.
Paisley Park pa aworaki ta funciona como un museo, cu exhibicionnan di e vestuario extravagante cu Prince tabata usa den su conciertonan, como tambe su instrumentonan y un coleccion di brommer.
Fuente: www.reuters.com
