Awe 5 di December ta un dia sumamente grandi y alegre pa nos di partido MEP ya cu nos lider maximo Sra. Mr. Evelyn Wever-Croes ta cumpli su 50 aña di edad. Un edad sumamente bunita y cual den e trayectoria di bida di nos lider ta marca cu logronan grandi riba tereno di su estudio di ley, como un profesional den trabaonan fiscal y abogacia, como un boluntario den organisacionnan social, como parlamentario y lider di fraccion di MEP y den su carera inigualabel como politico y lider di nos prestigioso partido MEP. Alabes como esposa y mama nos lider hunto cu su famia ta muestra di e union familiar cu mester existi den cada hogar aki na Aruba.
Sin duda cu nos di MEP tin e placer, dicha y bendicion di tin sra. Evelyn Wever-Croes ya pa mas di 7 aña caba den MEP y pa mas di 5 aña eligi democraticamente como lider di nos partido y ainda nos lider tin hopi mas di duna na nos partido y na comunidad Arubano. Nos lider ta un persona integro, balente, sumamente capacita, inteligente, social y semper cu e curason grandi pa yuda esnan mas vulnerabel den comunidad. Asina nos por mira con diariamente e ta preocupa pa e bienestar di nos mucha y hobennan y ta bringa pa proteccion di e grupo aki. Tambe nos ta contempla con den bista di nos lider nos grandi y nos pensionadonan mester wordo trata cu mas dignidad y respet. Y pa tur otro grupo den comunidad nos lider ta sali na defensa di nan bienestar.
Aruba tin un gran lider cu ta cla y prepara pa dirigi destino di e pueblo aki. Aunke cu tin forzanan aheno cu kier trata di mancha e imagen di nos lider, henter e famia grandi di MEP ta para cla pa defende nos lider incondicionalmente.
Lider Evelyn Wever-Croes, henter Conseho di partido MEP, Presidente y directivanan di districtonan, Forza Femenino Grace, Yega, lidernan di bario y votadonan ta desea bo un feliz cumpleaños awe y cu lo bo cumpli hopi aña mas di bida, cu hopi salud y bendicion. Cu nos Dios Todopoderoso sigui guia bo den bo lucha incesante pa logra e maximo bienestar y felicidad di nos pueblo. Pabien y mas pabien, lider!
Den cuadro di e cumpleaños di nos lider, nos lo celebra esaki den grandi dia 27 di December proximo for di 6’or pa 9’or di anochi na sede di MEP hunto cu Katatumbo y Grupo di Betico. For di awor aki caba un y tur ta invita.