Hendrik Tevreden (MEP): “Aruba na vispera pa celebra Dia di Himno y Bandera den grandi”

Manera nos himno nacional ta proclama, O, Aruba dushi tera, nos baranca tan stima, asina nos ta sinti nos mes cada aña ora cu e fecha 18 di maart ta acerca. Un celebracion cu ta bay mas leu cu solamente un fecha. Un celebracion cu ta pone nos refleha riba e echo cu nos ta un pais bendiciona, nos ta privilegia pa ta biba ariba Aruba, segun parlamentario Hendrik Tevreden.
Politikeria pa hopi aña a hinca nos pueblo den e atmosfera pa preocupa ta ken a menciona un fecha prome o laga, pero e mas importante ta pa nos para keto na e echo cu nos tin e libertad pa celebra nos himno y bandera pa motibo cu Betico Croes a logra culmina e lucha cu nos por celebra un evento asina importante y special.

Nos Himno
Betico Croes a mira den un himno y bandera instrumentonan clave pa logra trece union den nos pueblo. El a acerca e dos conocido musiconan, Juan Chabaya ‘Padu’ Lampe y Rufo Wever cu for di aña 1952 caba a compone e cancion cu awe ta nos actual himno di Aruba. E piesa aki tawata tin e ingredientenan pa expresa e amor di un pueblo pa su Pais, y ta enfatisa e amor patriotico di tur cu ta biba na Aruba.
Den añanan ’70 gobierno a instala un comision di e.o. Maybelline Arends-Croes, Rufo Odor, Padu Lampe, Eddy Bennett, Hubert ‘Lio” Booi y Rufo Wever. Y unanimamente a recomenda dia 25 di februari 1976 pa usa ‘Aruba Dushi Tera’ como nos himno nacional. E comision a propone pa añadi un couplet na e cantica, y asina hunto cu sr. Rufo Wever y sr. Padu Lampe, sr. Hubert Lio Booi a duna inspiracion pa añadi e ultimo couplet: Cu Dios por guia y conserva su amor pa libertad cu ta refleha cu nos pueblo ta un pueblo di fe den Dios.
Dia 16 di maart 1976 parlamento di Aruba a aproba Aruba Dushi Tera como himno oficial di Aruba pa dia 18 di maart 1976 proclama esaki den Wilhelminastadion na Dakota hunto cu e pueblo di Aruba.
E letranan di nos himno nacional ta inspira nos pa stima nos Pais, pa ta un mihor ciudadano, enfocando riba nos cualidadnan y forsa cu nos tin como pueblo. Laga nos como bon Arubianonan cu stimacion grandi pa nos patria, hisa nos bandera, canta nos himno Aruba Dushi Tera y sali celebra dia di himno y bandera den grandi. Di curason mi kier invita nos pueblo pa ta presente dia 17 di maart ariba Plaza Libertador Betico Croes pa e anochi cultural. Y sin lubida e bunita desfile riba dia 18 di maart 9:00 mainta na Plaza Libertador Betico Croes. Nos no ta celebra simplemente un fecha, sino un logro, di ta autonomo y cu e derecho pa dicidi pa nos mes riba nos mesun Pais. Mi ta desea Aruba henter, un felis dia di Himno y Bandera. Un tin nada pa kibr’e, sr. Tevreden a termina bisando.

Comments

comments