Hopi biaha famianan ta opta di bay afo cu nan ser keri, ya cu no tin specialista na Aruba pa trata nan. Mescos ta trata pa loke ta scolnan, unda cu no tin scol special pa e muchanan aki, ya cu mester mesclanan. Sr. Hans Geerman, cu e relato.
Sr. Geerman a cuminsa bisa cu muchanan special mester por wordo inclui den otro scol regular. Pero automaticamente e maneho mester ta cu mester evalua e mucha of persona special aki. E mester por pasa cierto test, e mester wordo evalua. Y si su evaluacion sali cu e mester wordo inclui den un scol regular, un scol mescos cu tur otro mucha regular ta bay, e mester bay wordo inclui den e enseñansa aki. Automaticamente, lo mester tin extra docente cu por duna asistencia si e persona aki, mester di extra les, extra guia. Pero, hecho ta cu nan mester wordo inclui den cualkier scol regular. Nan mester tin derecho di haya enseñansa formacion, mescos cu tur otro mucha regular.
Hopi mayor ta preveni di haci esaki, pa motibo cu e muchanan ta bira victima di bullying (tentamento). Y esey ta e motibo cu kier bin cu esaki, pasobra cu lo bay minimisa bullying. T abay pone cu muchanan regular lo cuminsa haya amor, stimacion, aprecio y respet pa e muchanan aki. Y mañan ta bay tin un comunidad hopi mas sano, hopi consciente, segun Sr. Geerman. Y esey ta e motibo pa cual inclusion ta masha importante, pasobra cu esaki ta bay yuda e comunidad pa acepta tur hende, a pesar di tur limitacion cu nan por tin. Y esaki ta conta tamba pa Salubridad Publico. No ta pasobra cu e persona aki ta special, e tin limitacion, pone un banda, laga su dianan ta conta. No, nan ta bay haya nan derecho, nan proteccion. Nan ta bay haya e mesun tratamento cu cualkier otro persona den nos salubridad publico. Esey ta bay ta e desaroyo, y p’esey e ley di inclusion ta importante, y indispensabel.