Durante un ceremonia chikito teni na e oficina principal di OTIS Carel Elevators Aruba NV, Helping Hand Foundation y OTIS a formalisa nan relacion cu a cuminsa for di aña 2013. Ta bon pa splica cu a funda Helping Hands Foundation na 2013 door di tres amigo cu a sinti cu mester haci mas pa nos muchanan di menos recurso. E fundacion ta yuda e muchanan aki door di brinda nan oportunidadnan igual.
“Teniendo esaki na cuenta Helping Hands ta organisa diferente actividad pa nan den temporada di vakantie. Fuera di esey ta yuda esunnan cu tin chens di perde nan educacion cubriendo nan gastonan pa asina nan por logra haya nan diploma”, asina un di e fundadonan, Rocco Tjon a bisa.
Andy Thijsen di OTIS, aportador y voluntario activo di Helping Hand tambe a splica cu e compania specialisa den lift a duna su aporte na tur actividad cu nan tin. “Tur actividad organisa pa e fundacion ta free of charge pa e participantenan, o sea, nan ta bay vakantiekamp gratis, actividadnan di Pasco Grandi y Pasco di nacemento sin cu mester paga pa nada,” asina el a splica.
Mirando e pasion y amor cu e tres amigonan aki tin pa yuda nos muchanan di menos recurso a conduci na oficialisa e partnership entre OTIS y Helping Hands pa e fundacion por sigui crece den aña 2017. E fundacion a cuminsa yudando mas o menos 100 mucha y durante e añanan cu a transcuri a crece y awendia ta yudando 250 mucha. Pa finalisa Tjon ta duna danki grandi na tur miembo voluntario cu ta yuda di curason y na companianan pa donacion valioso di semper cu ta haci tur e gestonan aki posibel y special.