Despues di varios luna di preparacion awo Heintje Ras ta cla pa bay pasa 100 dia den e minanan di fosfaat na Sero Colorado. E preparacion tabata uno hopi intensivo segun Heintje. Ta un staff completo ta tras di henter e proceso di preparacion. For di e parti di nutricion te cu e parti medico. Awo unico cos cu falta ta pa e dia yega pa asina pasa e 100 dianan bou di tera.
Ta faltando solamente 3 dia prome cu haci entrada den e minanan di fosfaat. Ta pa hopi aña caba cu Heintje a haci su cas un museo, pero e tin asina hopi material di pasado, cu su cas a bira mucho chikito. Pues e hazaña ta pa asina recauda fondo pa por yega na un tereno y djey un edificio mas grandi. Ras tin un coleccion grandi di varios articulo di antes y tambe di auto nan clasico, y pa haci esaki e tin mester di un espacio mucho mas grandi.
Heintje Ras ta gradici Dios cu ta esun cu a traha e plan pe, y e ta esun cu tin cu ehecuta e plan aki. Ta prome biaha cu un hende na mundo lo haci un hazaña asina, 100 dia den scuridad den e minanan no ta uno facil, segun Heintje Ras.
