LIMA, Peru- Mayoria di e hefenan di estaod y di gobierno a reuni diasabra na Lima, pa e di ocho Cumbre de Las Americas. Nan a haci un yamado pa evita un escalada di violencia na Siria, despues di e atakenan ehecuta door di Merca diabierna anochi cu e colaboracion di Reino Uni y Francia.
Aunke gran parti di e participantenan a condena e uzo di armanan kimico, supuestamente uza pa e regimen Sirio siman pasa, ta solamente e Prome Minsiter Canades, Justin Trudeau, a expresa di manera habri su apoyo na e atake lidera pa su pais bisiña.
Di otro banda, e president di Boliva, Evo Morales y e minister di Relacionnan Exterior di Cuba, Bruno Rodríguez, a critica e accionnan Mericano riba teritorio Sirio.
Morales a califica Merca como e principal menasa contra di paz, democracia, libertad, Mama Tera y e multilaterismo. El a pidi pa e “imperio Mericano stop e massacre di inocentenan na Siria”.
Di otro banda, Rodriquez a reitera e declaracion emiti diabierna pa gobierno Cubano, unda cu e ta califica e bombardeo Mericano riba Siria como un “accion unilateral illegal, sin evidencia ni conclusionnan”.
Durante nan respective intervencion, e resto di e lidernan a aboga, den su mayoria, pa busca un solucion den cuadro di derecho internacional, derecho humano y e resolucionnan di Nacionnan Uni.