Sr. Randolph Ruiz, CEO encarga cu maneho di WEB Aruba NV ta splica tocante e hedging y kico tur por spera den e proximo lunanan nos dilanti pa loke ta trata awa di prijs y coriente.
E contractnan di hedging a caba na 2017 y na 2018 a hedge e prome tres lunanan, y esaki ta pa proteha e prijs di subi. Manera ya ta conoci, na November 2017 e prijs di fuel tabata na 51 dollar y el a subi te na 56 dollar na habrimento di aña. Di un manera of otro, mester proteha e inversion.
Esaki ta trece cun’e, cu e hedging aki ta pa e proximo tres lunanan. WEB NV tin tres consehero di Merca y nan tin un hedge team, cu ta traha ariba strategia cu nan lo sigui. Esey ta, segun SR. Ruiz, nan lo bay implementa esaki y nan lo sigui cun’e.
E pregunta primordial ta si mester sigui hedge. Pero Sr. Ruiz a bisa cu na cuminsamento di 2017 e prijs pa bari di petroleo tabata na 51 dollar y awo ta na 56 dollar. E cinco dollar ta haci hopi diferencia. Sino lo mester bay bek na e sistema bieu, y si no tin otro recurso, lo mester bay bek na e prijs di coriente cu ta cobra e pueblo. Y esey ta ultimo loke cu WEB NV lo kier haci.
E hedge, segun Sr. Ruiz, ta pa proteha e subida. E gastonan di WEB no ta solamente e fuel, e tin hopi mas cosnan manera inversion, mantencion. Tur esaki ta forma parti di e operacion di e planta. For di 2014 te dia na cuminsamento di aña aki, a keda baha e prijs. Pero di 2014 pa aworaki a baha e prijs casi cu 12.5%. Esey ta e prijs na cual nan ta bende e coriente na Elmar, y Elmar tambe tin un otro prijs.
Sr. Ruiz a sigui bisa cu e hedge ta proteha e prijs, ya cu ta traha un budget pa cuminsamento di aña pa traha cun’e henter aña y esey mester proteha. Si bo tin bo margen un tiki ariba un tiki abao, pero si e prijs subi cu 10 dollar, e budget no ta bay want’e. E resultado final ta un tiki menos y esey ta menos inversion pa e siguiente aña. Pero ta purba di want’e mas cerca di loke bo a presupuesta. Pero tin indicacion fuerte cu den e proximo lunanan e prijs lo sigui subi, y no tin indicacion cu e ta bay baha. A hedge pa e proximo tres lunanan, pero mester wak ya caba pa mas aleu.
Pa loke ta e prijs di awa y coriente, Sr. Ruiz a bisa cu nan ta wak nan mes den e mesun rumbo cu gobierno, cu nan tambe kier baha prijs, pero tin cierto cosnan cu mester tene cuenta cun’e. Mantencion y tin varios ekiponan cu ta bieu, cu ta rekeri un cambio. E boilernan mes tin di entre 20 pa 40 aña bieu, y esaki ta costa tempo y tambe placa. Ta traha un presupuesto, si tin espacio, ta haci esaki. Naturalmente kier baha prijs, pero si compara Aruba cu otro paisnan den Caribe, toch Aruba su prijs ta bou di e margen di full Caribe, pa loke ta trata prijs di awa y coriente.
Algo cu ta masha importante ta reliability. Awa y coriente ta wordo duna constantemente na Aruba, y Aruba, tin un sistema di make sure cu tin awa y coriente. Den e ultimo añanan tabata tin un porcentahe di 95% di suministro di awa y coriente . Na Aruba awa y coriente ta hopi stabiel, pero su costo di mantencion ta hopi halto.
Tin hopi inversionnan cu ta wordo haci pa sigura cu e suministro di awa y coriente ta na 95%, segun Sr. Randolph Ruiz, CEO di WEB Aruba NV, encarga cu e maneho.