Hedging a cuminsa na 2009 bou ex gobierno di MEP, e tempo ey a insisti pa KPMG traha un strategia cu na momento cu e prijs di crudo tabata aumenta drasticamente. Esaki a wordo haci pa trata di mantene e prijs stabiel, a cuminsa ta hedge pa 30% di e cunsumo total di WEB, cu tabata usa entre 3 mil cu 4 mil bari pa dia, esaki a significa cu pa tres luna si e prijs baha of subi riba mercado internacional, cu e contracto di Hedging cu a wordo cera, ta keda mantene e prijs cu a wordo cera den e contract di hedging.
Cu e sistema di Hedging aki tabata purba di proteha cu si e prijs di crudo aumenta drasticamente, na Aruba ainda por brinda pueblo un miho prijs.
Na 2012 a dicidi di cuminsa bek cu hedging y te cu awe ainda WEB ta hedge. Na 2012 den e parlamento di Aruba Ex Minister di Energia, Mike de Meza a cuminsa na spanta e pueblo y parlamento, como un experto den asuntonan di refineria ela declara den parlamento, cu e prijs di crudo lo aumenta drasticamente den e a ñanan nos dilanti, cu e declaracion aki ela spanta parlamento y full e comunidad di Aruba, bisando cu e prijs di crudo lo keda aumenta y te hasta lo alcansa 500 dollar pa bari.
E management team di WEB cu tabata consisti di e dos directornan, a cuminsa haci e proceso aki bek y den un raport produci na 2015 pa Pricewaterhouse & Coopers, cual ta e compania cu a traha e raport investigativo riba e parti di hedging aki, ta para cu lo mester bay considera condicionnan mas moderno, manera prome tabata hedge pa 30% di e volumen y pa maximo 3 luna, pero den e strategia nobo, nan a uza un otro compania acerca cual ta Case and Company, hunto cu e management team di WEB y cu e condicionnan moderno nan a yega na e strategia cu nan ta bay hedge, 90 pa 95 % di e consumo cual ta casi full e consumo y cu un periodo di maximo di 36 luna.
E resultado di e raport investigativo a bisa tambe cu mester di un team nobo y Gobierno a nombra un hedging team, e team di hedging nobo tabata consistiendo di un tal meneer Jansen, un tal meneer Werleman, un tal meneer Reyes y un tal meneer Croes.
Actualmente WEB tin e Board di WEB, e management team di WEB cu tabata constisti di e directornan, tin Case and Company cu ta un adviesbureau, specialisa den hedging y e hedging team cu ta 4 persona local. Tambe den e raport a bin sali na cla cu e hedging team consistiendo di e 4 personanan local aki, no tabata tin niun experiencia anterior cu hedging, pa por a forma parti di e team di hedging, e personanan aki no tabata tin niun educacion specifico of experiencia cu hedging, ni e management team no tabata tin experiencia cu hedging.
Na september 2014 nan a cuminsa cu e proceso di hedging pa aña 2015 caba, nan tabata premira mane cu ex Minister Mike De meza a bisa den parlamento cu prijs di crudo lo aumenta drasticamente. Ora e management team a presenta e pakete di hedging pa 2015, na e board di WEB, por mira den e raport, cu e mesun dia esta 2 di september 2014, e pakete aki a wordo firma y aproba mesora. Na final di september 2014 e board a firma pa por cuminsa hedge pa 2016.
Tempo nan a firma e prome pakete di hedging, e prijs di un bari di crudo tabata na 90 dollar y e di dos cu nan a firma e prijs tabata na 82 dollar pa bari. Den dos luna di tempo den 2014 prijs di crudo a baha te na 30 dollar pa bari, cu otro palabra pueblo ta paga 90 dollar pa e produccion y ora e recibo yega bo cas, bo ta pagando e prijs di e desicionnan eroneo y decision fatal, cu tanto management team y e supervisory board a tuma, di cual ambos bou nombracion di e ex Minister Mike de Meza.
Parlamentario Endy Croes ta puntra su mes, ken sa kiko tin tras di esaki, paso na final esaki a costa e pueblo mas di 250 miyon florin, sin cu pueblo por a sinti un rebaho den prijs di awa y coriente.
Banda di esaki tin e aspecto político, dia 1 di oktober 2014 momento cu tur esaki a tuma luga, WEB tabata den cora y a dicidi di aumenta e prijs di awa y coriente entrante 1 di oktober 2014.
Segun Parlamentario Endy Croes, ssaki ta prohibi pa lubida, paso e pueblo aki a sali balentemente y dilanti di parlamento nan a bay manifesta pa e inhusticia cu tabata tumando luga y kico tabata e resultado politico, Mike Eman cu bou dje ta cay Openbare Orde a manda Riot Comando pa e pueblo aki y a bati e humilde pueblo, mientras e pueblo tabata buscando husticia, buscando su derecho, pa e mal desicionnan abrupto cu a wordo tuma contra dje.
E board cu tin di WEB, ora mira nan experiencianan cu hedging ta para zero, nan tabata esunnan cu mester ta responsabel pa locual cu a pasa y te cu awe ta pasando, e contract di hedigng ta bay finalisa december 2017 porfin.
Parlamentario Endy Croes ta pidi awo cu e hedging contract ta bay caba pa e gobierno actual cumpli cu e pueblo y yega na cierto prijsnan mas preferencial y cu esaki por resulta tambe dentro di algun luna, cu nos por mira riba nos recibonan un rebaho di prijs di awa y coriente.
Parlamentario Endy Croes ta na altura cu e condicionnan eyfo ta hopi duro, paso den campaña a bishita casnan y un di e factornan hopi grandi tabata e costo di bida y sigur esaki lo pisa hopi. Endy croes ta haci un apelacion na gobierno pa haci su maximo esfuerso, pa pone hende central bek y trata na tur manera pa reduci e prijs di awa y coriente.