Dia 12 di augustus mundialmente ta celebra Dia di Hoben, unda ta reconoce, pone atencion y conscientisa tocante topiconan relevante na hobennan. Durante ultimo añanan hobennan ta liderando diferente ‘movements’. Por referi na Greta Thunberg cu ta conscientisa tocante
cambio di clima; na Merca unda un grupo di hoben a lidera un marcha contra uzo di arma di candela, y nos no tin cu mira mucho leu pa realisa cu nos hobennan na Aruba tambe ta vocifera nan mes ora cu hopi hoben a marcha contra abuso di mucha juni ultimo.
Reconociendo e potencial y habilidadnan di hobennan, Heart-Centered Leadership Foundation a organisa dia 12 di augustus un ‘Impact Café’ virtual riba e topico di ‘Hobennan y e pandemia di COVID-19 na Aruba’ (‘Youth Engagement and the COVID-19 Pandemic in Aruba’). Impact Café ta sessionnan interactivo unda hobennan ta bin hunto, contesta preguntanan tocante un topico y propone solucionnan pa mehora con hobennan ta experiencia esaki na Aruba.
Pa prome biaha a organisa un Impact Cafe virtual, unda a uza e plataforma ‘Google Meet’ pa e encuentro. Despues cu 13 hoben a registra, a conta cu participacion di 10 hoben entre edad di 15 y 23 aña. E hobennan a wordo parti den 2 grupo y a bay den dialogo riba con nan a experiencia e medidanan tuma a consequencia di coronavirus y e solucionnan cu nan ta propone pa evita un di tres ola di e virus na Aruba. Pa facilita e proceso y motiva e dinamicanan den grupo, cada grupo a conta cu 2 ‘hosts’, kende tabata tey pa scucha, yuda guia e conbersacion, y yuda e hobennan formulanan ideanan door di puntra preguntanan. ‘Hosts’ ta boluntarionan jong di Heart-Centered Leadership Foundation cu a sigui un training pa facilita conbersacon den grupo.
Ful e grupo a topa bek den un espacio di ‘Google Meet’, unda 1 representante di cada grupo a comparti nan top 5 ideanan y solucionnan pa preveni un di 3 brote di coronavirus. E evaluacion di e hobennan pa cu e Impact Cafe tabata uno hopi positivo y nan a sugeri pa tene mas di e encuentronan aki.
E siguiente stap ta cu un grupo di e hobennan aki ta bin bek hunto bao di capa di e actividad Impact Factory, unda nan lo bay formula solucionnan concreto riba e ideanan cu nan a propone durante Impact Cafe. Lo traha un relato di nan proposicionnan y comparti esaki cu publico y diferente stakeholders. E idea ta cu e hobennan mes por bin cu proyectonan pa traha riba e solucionnan of inspira otronan pa implementa esaki.
Heart-Centered Leadership Foundation ta para pa empodera hobennan y crea lidernan cu ta lidera for di nan curason. Bao capa di nos programa ‘Sustainable Me – We’ ta ofrece
seminarionan, tayernan, actividadnan y ‘coaching’ cu ta traha riba e metanan nucleo: 1.
desaroyo personal y profesional, 2. involucra y participacion di hobennan, y 3. trabao boluntario y servicio na comunidad. Cu e actividadnan di Impact Cafe y Impact Factory ta involucra hobennan riba discusion di diferente tema y boga pa mas di nan participacion den procesonan di decision.