Tur cos ta pasa pa un motibo, Minister di Salud dr. Alex Schwengle a expresa durante di e celebracion di graduacion di e nursenan cu a logra nan titulo HBO den e ramo di Maatschappelijke Gezondheidszorg. E mandatario a referi na e “timing” cu tabata excelente relaciona na e coordinacion di e reforma cu ta andando den e ramo di Geestelijke Gezondheidszorg na Aruba.
Minister Schwengle a splica cu e fundacion ta estableci caba, y actualmente ta e proceso a cuminsa pa establece un “Raad van Toezicht” (Conseho di Supervision) y e maneho di e stichting. E reforma no ta trece ningun risico pa esunnan cu ta trahando den e ramo aki caba; nan posicion huridico ta keda sigura, segun e Minister. E necesidad pa mas personal profesional den e ramo di enfermeria specialisa den cuido y guia di e pashentnan cu un afliccion of condicion cu ta afecta nan psicologicamente ta existi. E grupo di graduadonan aki lo yuda yena e cuponan di trabao cu ta existi y/of e cuponan cu a of lo wordo identifica den e proceso di e reforma.
Minister Schwengle ta sumamente satisfecho cu un grupo di enfermero a tuma e reto tres aña pasa pa participa na e opleiding como cu tin mester di dos team di ocho persona – un pa Oranjestad y un pa San Nicolas, pa cuminsa cu e servicio di “ambulante zorg”. Ambulante zorg ta cuido y guia cu ta wordo ofreci na cas of durante di bishita na un clinica. E cuido intramural, entre otro na PAAZ, tambe lo conoce mehoracion y expansion cu e reforma aki.
Rafael Lopez, kende ta coordina e opleiding Maatschappelijke Gezondheidszorg pa Instituto di Formacion den Enfermeria di Corsou a splica cu a traha hopi duro pa realisa e curso y a tuma tambe di banda di e studiantenan hopi esfuerso, como cu particularmente durante di e ultimo aña banda di sigui cu e modulenan coriente nan mester a traha riba un investigacion y completa na tesis. Ademas, mayoria di e cursistanan tambe tabata trahando tempo completo.
Di e 19 studiantenan, 16 a caba e curso; 13 a pasa cu un voldoende. E tres personanan cu no a caba cu nan tesis por entrega esaki ainda riba dia 2 maart y esunnan cu a haya un onvolvoende ainda por entrega nan documento pa fin di luna di maart pa pasa den un evaluacion mas. E studiantenan a demostra tremendo dedicacion na e programa, y e sacrificio tabata grandi. E comision di evaluacion di e presentacion di e tesis a consisti di representantenan di Examenbureau Aruba y di e instituto opleiding pa enfermeria di Corsou, y e dos “gecommiteerde” cu a cualifica e investigacion cu e studiantenan a haci. Lopez ta splica cu e curso aki ta prepara e enfermero pa un funcion di maneho y tin dos of tres di e cursistanan cu ya a cambia di funcion caba; e otronan lo keda cu nan funcion actual pa awo.
E intencion ta pa cuminsa cu un di dos grupo di cursista na luna di september, y ya tin 45 candidato cu e expresa interes den e opleiding. E posibilidadnan pa na Aruba haya un HBO opleiding ta hopi limita. E opleiding aki mes a tuma luga tres biaha so; 35 aña pasa, na 1997 y actualmente. Despues di e di dos programa, cuminsando na september proximo, lo probablemente para pa algun aña atrobe te ora identifica un necesidad atrobe.
Minister Alex Schwengle ta agrega cu den e proceso di reforma di geestelijke gezondheidszorg lo inclui cu tempo e cuido di adicto tambe. E organisacion lo resorta bao di AZV. Tabatin un necesidad grandi pa un organisacion unda cu ta integra y envolve henter e “veld” di cuido mental; y esaki ta tumando luga actualmente, e “veld” ta hopi entusiasma, el a bisa. E mandatario ta felicita e graduadonan, y ta gradici nan pa nan dedicacion y esfuerso, y na famia y sernan kier pa e sosten cu nan a brinda na e cursistanan. Minister Schwengle ta gradici tambe e instituto specialisa den opleidingnan pa enfermero di Corsou y Dienst Volksgezondheid di Aruba pa e esfuersonan den e realisacion di e programa.
E titular di salud ta expresa cu e ta contento cu e interes cu e enfermeronan a desplega y ta desplegando, como cu cuido ta algo hopi personal y e “link” cu comunidad ta hopi mas fuerte ora e cuido ta wordo ofreci pa personanan cu conoce e cultura, e idioma y lenguahe y e manera di ta di e pashent. Ademas, e ta bon pa tin enfermeronan local mes pa haci e trabao, como cu e placa ta keda Aruba, y pues e ta bon pa e economia di e isla tambe.
Minister Schwengle a conclui bisando cu e programanan manera esun cu a tuma luga ta forma un parti importante di e manpowerplanning pa cuido di salud. Esaki ta algo cu ta sinti falta di dje den varios area di salud publico, pero cu e ta conociendo mehoracion den forma entre otro di manpower planning pa tempo largo.