NEW YORK, Merca – Harvey Weinstein lo a yega na un acuerdo cu e Fiscal General di New York y su trahadonan di su ex studio di cine pa compensa pa e dañonan genera na e presunto victima cu a entrega un demanda contra di dje y e su ex- sociaonan pa abuso y acoso sexual.
E grupo di actriz cu a acusa Weinstein ta hopi grandi, pero e prome nomber cu a aparece publica den The New York Times tabata e di Ashley Judd. Dia 5 di october e muhe a saca na luz di dia e actonan di acoso sexual di e productor. E actriz a conta con binti aña pasa Weinstein a invit’e pa un hotel na Beverly Hills pa desayuna, al menos Judd a kere esey.
Sin embargo, Judd a haya su mes den un situacion totalmente diferente, e productor a ricibi’e bisti den bata y a puntr’e si e por a dun’e un masashi of si e por a wak’e ora e tabata baña. Door cu el a rechas’e, e interprete ta conta cu e director a zorg pa caba cu su prestigio, perdiendo oportunidadnan profesional, placa y status..
Despues di e declaracionnan di Judd, e acusacionnan no a stop di drenta. Awo, e producto Mericano lo tin di paga 44 miyon dollar pa soluciona e demanda presenta pa e oficina di e fiscal di New York contra di dje, su ruman Robert y e conseho di administracion di su compania. Di e placa acorda, 30 miyon lo ta destina pa victimanan di abuso y pa paga esunnan cu e debe despues di cu su compania di produccion a keda den ruina door di e scandal, segun informenan di The Wall Street Journal.
E acuerdo nobo aki lo no tin niun influencia ariba e huicio cu lo tuma luga na september, despues di a wordo geschorst dos biaha. Aunke Weinstein ta sigui nenga y ta argumenta cu e no a viola niun di su empleadonan.