Willemstad Curacao: Komandante Walter Hansen ta e Komandante nobo di Forsanan Naval den Region Karibe Hulandes. Den e funshon aki e ta tambe Direktor di Wardakosta Region Karibe i Komandante Task Force 4.4. Komandante Hansen awe a tuma e batuta di General di Brigada di Infanteria di Marina, Frank Boots.
Boots a kuminsá 3 aña pasá durante un temporada tumultuoso, COVID-19 a hunga un papel grandi den esaki. E ròl di Militarnan di Kòrsou a bira, tambe pa e motibu aki, kada bes mas importante, ku resultado di hopi solisitut pa asistensha. Apesar di ku durante último 3 añanan orkannan real no a materialisá, na 2021 Boots a guia e despliegue militar despues di e temblor na Haïti. E despliegue Hulandes a tuma lugá dentro di un mishon humanitario di asistensia di emergensia di Union Europeo.
E kolaborashon ku e Paisnan durante último 3 añanan tabata sentral. Por ehèmpel, a establesé akuerdonan pa forma e Trayekto di Formashon Sosial na Aruba i Kòrsou. Tambe na nivel internashonal a fortalesé e kolaborashonnan pa pone aun mas énfasis riba akshonnan impulsá pa informashon. Den esaki paisnan den region manera Colombia ta di gran importansha i durante e último 3 añanan a tuma pasonan importante pa kolaborá ku otro na un forma mas intensivo.
Na 2022 Defensa i Wardakosta Region Karibe huntu a sòru pa un aña ku a kibra rekòr na kapturashon di droga; un total di mas o ménos 35.000 kilo di droga a keda interseptá. Ademas di e éksito operashonal aki durante e aña aki tabatin Velas Latinoamerica Curacao ku a hunga un gran papel; e pelíkula ‘Invasie’ a keda grabá, i e serie di Wardakosta a risibí un éksito di oudiensia internashonal riba National Geographics. E aña despues Kas Real a hasi un bishita na Region Karibe, ku un promé enkuentro pa sera konosí ku Prinsesa Amalia. Durante e bishita special aki Defensa den Region Karibe Hulandes a ehersé un ròl importante tantu den fondo komo riba promé plano.
E Komandante nobo, Komandante Hansen, no ta deskonosí ku Region Karibe Hulandes. Durante su karera, Hansen a akumulá hopi eksperiensha, tantu ku Defensa komo ku aporte na Wardakosta den Region Karibe di Reino Hulandes. Einan mes el a okupá vários puesto, tal manera Komandante di e Cutter Jaguar di Wardakosta, Ofisial di Estado Mayor CZMCARIB, enkargá ku operashonnan internashonal anti droga, Hefe Operashonal na Wardakosta Region Karibe Hulandes, i durante despliegue ku vários barku di patruya. Banda di esei for di Hulanda e tabata a Konsehero di Maneho pa asuntunan di Region Karibe i Wardakosta.
Hansen lo sigui enkaminá e kaminda elegí pa su predesesor pa mehorashon i renobashon di e Organisashonnan Defensa i Wardakosta. Den esaki e ta esforsá su mes pa kontinuá ku e kolaborashon eksitoso ku sosionan stratégiko lokal i internashonal.
Huntu nos lo sigui traha pa reforsa nos organisashon i kumpli ku e mishon di e Komando di Forsanan Naval den Region Karibe Hulandes i Wardakosta Region Karibe Hulandes.
Boots ta bandoná Defensa. E ta baha di su funshon ku penshun adelantá.