PORT AU PRINCE, Haiti -Pa di seis dia consecutivo Haiti ta paralisa, mei mei di protestanan violento convoca pa sectornan di oposicion y gruponan social contra di e gobierno di Presidente Haitiano, Jovenel Moise, cu ta mantene silencio.
Den oranan trempan di diamars, e capital a sigui ta blokia pa baricada y tirenan na candela den careteranan principal, strobando e comunicacion terestre entre Port Au Prince y e resto di e nacion Caribense, scenario di protesta desde 7 di februari, e mesun dia cu Moise a cumpli dos aña den e cargo y cu manifestantenan ta pidi su renuncia.
Scol y banconan ta sigui cera, como tambe negoshi y pompnan di gasolin, hopi di cual tabata victimanan di sakeo den e dianan aki, door di manifestantenan rabia cu ta denuncia e precariedad economico di e pais, esun mas pober di America y unda al menos 7 persona a muri desde cue protestanan a cuminsa.
Den e ultimo horanan varios parlamentario y diputadonan opositor a uni na e peticion di dimision di Moise, cu no a duna niun declaracion pa cu e situacion despues di e yamada pa diaologo cu el a haci diasabra cual a worod rechasa pa sectornan di oposicion.
Comunidad internacional y e sector economico nacional a haci un yamada na dialogo pa busca solucion na e crisis politico y economico, cual no a logra controla e protestanan, cu segun informenan, lo continua.
Mei mei di e crisis severo, gobierno a declara dia 5 di februari ultimo un emergencia economico, cu ta implica, reduci gasto di e materialnan di prome necesidad of aumenta e acceso na credito di empresanan chikito pa purba mitiga e crisis.
E situacion di Haiti e aña aki a bira mas grave, door di un devaluacion grave di e moneda oficial cu ta na 83 gourde pa 1 dollar, como tambe pa e crisis di electricidad deriva di e escasez di gasolin, suma na un inflacion di dos digito.
E pais no a logra aproba e presupuesto pa e aña aki tampoco, di 1.650 miyon dollar, cual a wordo rechasa januari ultimo pa e Camara di Diputado despues di argumenta cu e no ta convence e Camara.
Den e protestanan e manifestantenan ta exigi husticia tambe den e supuesto iregularidad den e programa PetroCaribe, a trabes di cual Venezuela tabata bende petroleo na Haiti, na prijs di baca flaco.
Un auditoria presenta siman pasa pa e Algemene Rekenkamer a revela iregularidadnan entre 2008 y 2016 den e programa aki y a señala 15 ex minister y actual funcionarionan cu ta involucra den e caso aki, como tambe un compania cu Moise tabata dirigi prome cu el a asumi presidencia di e pais.