Haiti a cuminsa cu’n investigacion hudicial riba malversacion di fondonan di PetroCaribe

PORT AU PRINCE, Haiti- Prome Minister di Haiti, Jean Henry Ceant, a anuncia accionnan di Husticia contra di tur esunnan cu ta involucra den e malversacion di fondonan di PetroCaribe. Esaki ta bin despues di cu’n auditoria presenta siman pasa pa Rekenkamer a revela iregularidadnan entre 2008 y 2016 den programa aki.
Ceant a anuncia esaki a traves di Twitter, unda cu el a señala cu “estado di Haiti awo ta meti den e buskeda di kico a pasa cu e fondo di PetroCaribe. Semper nos a bisa cu nos ta na e banda di Husticia”.
E accion presenta dilanti Ministerio Publico, pero e Prome Minister no a duna mas detaye di esaki, cu ta uno mas ariba e cantidad di personanan buscando husticia den e caso aki.
Casi 15 ex minister y actual funcionarionan ta meti den e caso aki, como tambe un compania cu e actual presidente di e pais, Jovenel Moise, tabata dirigi prome cu el a asumi poder dia 17 di februari 2017.
Un auditoria di e Rekenkamer presenta dia 1 di februari a revela iregularidadnan entre 2008 y 2016 den e maneho di e fondonan di e programa PetroCaribe, a traves di cual Venezuela tabata suministra petroleo na e pais pober aki na prijsnan di baca flaco.
Rekenkamer a entrega Parlamento e resultadonan di e auditoria den cuadro di un investigacion cu ta wordo realisa pa e caso aki, cual aña pasa a provoca manifestacionnan, hopi di nan multitudinario, pa reclama husticia.
E informe, di 288 pagina, ta revela cu hopi di e fondonan a wordo destina pa proyectonan sin planificacion, sin estudio, sin respeta procesonan legal. Y ademas, a realisa transferencianan monetario sin control y cu mas di un decena di compania a cobra sin cu nan a caba cu e proyecto.
E auditoria ta calcula cu e fondonan genera mediante e programa ta di 4 biyon dollar, e mita di cual e pais (Haiti) lo tin cu paga den lapso di 25 aña.
E informe ta denuncia e falta di control den e entrega di contractonan na companianan crea pa beneficia personanan cerca di e ehecutivo di e pais e tempo ey.
Por ehempel, e informe ta señala cu e gobierno actual a gasta 600 miyon dollar den programanan pa mehora e sistema energetico malisimo di e pais, pero e pais ta atravesando un crisis grave den e sector aki.
Mesun cos ta pasa cu e programanan di asistencia social, na cual a destina 100 miyon dollar, sin resultado. Pero tampoco ta existi documentonan cu ta hustifica e inversion, cu tambe ta forma parti di e fondonan di PetroCaribe.
Oposicion a anuncia un protesta pa diahuebs, coincidiendo cu e di dos aniversario di e gobierno di Moise, cual administracion ta marca pa un crisis economico y politico.

Comments

comments