Rodymar Geerman, Chef Sport Ontwikkeling di IBISA a splica di campaña di DVG cu tur instancia y departamento cu ta promocion di salud manera IBISA, ImSan, SVB, FADA, HAVA, Hospital y otronan pa promocion di salud.
Manera ta conoci cu Covid-19 ta andando y ta keda e mensahe di keda hisa bo sistema inmuno pa e motibo aki a bin cu idea pa tur departamento keda duna tips di conscientisacion.
sr. Geerman ta bisa cu un miho sistema inmuno, tin defensa halto cu ta preveni cu ora Covid-19 yega e persona por trata miho cu e virus. Durante e seis siman, abou di guia di DVG lo keda bin cu tema di come saludabel, haci actividad fisico, maneha stress, practica hygiene.
E siman aki lo elabora un poco mas di actividad cu hende por haci riba Facebook page di DVG. Tambe riba medionan di IBISA lo pone tips pa movecion, manera lanta mainta y haci un ‘warm up’ pa asina e curpa ta mas relaha.
“Purba di evita sinta hopi, un persona cu ta traha den kantoor, purba lanta cada 30 minuut sea 1 of 2 minuut pa asina e sanger por circula y relaha musculo. No keda tur e 8 ora ta sinta sin ningun movecion”, e ta splica.
E ta recomenda tambe pa persona tur dia por lo menos train of haci movecion di curpa pa 30 minuut largo of mas pa asina e sistema inmuno di e curpa tambe bira halto. Pa mas informacion por bay riba Facebook page di DVG of IBISA.