Diamars anochi, diamars 17 di september, ELMAR a lansa e prome edicion di nan iniciativa Contacto Cu Bario, na MFA Noord. E evento a tuma lugar di 7 or pa 9 or di anochi, y a reuni habitantenan di e districto di Noord y clientenan di ELMAR pa un anochi di informacion, encuesta y dialogo.
Durante e sesion aki, a trata asuntonan importante manera:
– E desaroyonan di Plan Acelera di Mantencion di ELMAR
– E proceduranan pa aprobacion pa conecta instalacion di panel solar na e red di coriente
– Y un splicacion riba ‘Compronde bo Cobransa miho’.
Representantenan di ELMAR a duna un splicacion detaya na e participante tocante e proceso di inspeccion di instalacion di panelnan solar. A duna asistencia na tur esnan cu tin interes pa instala panelnan na cas of negoshi, pero no sa bon con pa cuminsa. E habitantenan a haya guia di expertonan riba kico ta posibel y kico no, y tambe cerca ken nan mester dirigi nan mes pa completa e instalacion di panelnan solar. ELMAR a enfatisa cu e proceso di aprobacion di instalacion di panelnan solar tin algun paso importante pa nan sigui. A recomenda fuertemente na esnan cu tin interes den instala sistema di panel solar pa tuma contacto prome cu un instalado reconoci, kende na su turno lo haci un peticion na ELMAR pa un Aprobacion Preliminar. E Aprobacion Preliminar ta necesario prome cu inverti den panelnan solar of haci algun tipo di instalacion pa sigura cu bo sistema ta cla pa conecta na e red di coriente di Aruba.
Pa esnan cu tin dificultad pa compronde nan cobransa di coriente, e team di Customer Service y Billing di ELMAR tabata na disposicion pa yuda. Clientenan cu a asisti por a haya aclaracion riba nan preguntanan tocante nan cobransa, sigurando cu nan a sali cu un comprension mihor di nan factura y consumo. Pa mas informacion, subi ELMAR su website www.elmar.aw y bishita e seccion “Payment & Billing” y “Understand Your Statement”.
E evento aki ta marca e cuminsamento di un serie di actividadnan Contacto Cu Bario caminda cu ELMAR tin como meta pa fortalece nan conexion cu e comunidad rond di Aruba. E iniciativa ta duna ELMAR e oportunidad pa mantene e comunidad informa tocante desaroyonan y pa continua mehora e servicio pa su clientenan.
E habitantenan di Noord a responde cu un bon bini caluroso na e prome edicion di Contacto Cu Bario, y ELMAR ta spera pa expande e programa na otro barionan pronto. Keda pendiente pa e siguiente Contacto cu Bario.
