Recientemente, Quota International Inc. a tene nan Reunion Anual pa Region 10 cu a tuma luga na Landgoed Zonheuvel Doorn, Hulanda y como Regional Director 2108-2020, di Region 10 a keda nomina y eligi den persona di Sra. Gwendeline van Trikt-Rojer di Quota International Aruba.
Gwendeline van Trikt-Rojer ta un miembro activo di Quota desde 2011 y a ocupa diferente puestonan den Quota International Aruba su directiva, entre otro, Director di Development & Growth 2013-2014, Director di Service Projects 2014-2015, Vice-Presidente 2015-2016 y Presidente di 2016-2017.
Durante e reunion aki, tur Quota Club di Region 10 a encontra cu otro y hunto ta eligi un Regional Director nobo, cual funcion ta encera e tarea pa representa Quota International Inc pa dos aña consecutivo y tin cu lidera y supervisa e Region. Alabes e meta di e reunion anual aki ta pa intercambia ideanan pa proyectonan na beneficio di comunidad y pa sigui reenforsa e metanan di e organisacion. Un total di 60 miembro a participa.
Region 10 di Quota International Inc. ta consisti di e siguiente Quota Clubnan: Quota International of Aruba, Quota International of Curaçao, Quota International of Curaçao Silver, Quota International of St. Eustatius. Quota International of Trinidad & Tobago, Quota International of Suriname, Quota International of Amsterdam-Hulanda, Quota International of Rotterdam -Hulanda y Quota International of Zeist -Hulanda.
Presente tambe na e reunion importante aki tawata Presidente di Quota International Inc. Sra. Marie Dawson, kende a biaha specialmente for di Canada pa Hulanda pa atende e reunion aki.
Durante e parti di celebracion , Presidente di Quota International Inc., Sra. Marie Dawson conhuntamente cu Regional Director, Region 10- Saliente, Sra. Valentina Cijntje-Engelhardt a haci e acto ceremonial oficial y anuncia cu e Regional Director 2018-2020 pa Region 10 ta Sra. Gwendeline van Trikt-Rojer.
Quota International Inc. ta un organisacion internacional di servicio consistiendo solamente di hende muhe ehecutivo cu ta traha boluntariamente pa yuda instancianan cu ta traha cu personanan cu limitacion di oido, hende muhe y muchanan den situacionnan di abuso y esunnan mas vulnerabel den nos comunidad.
Quota International Inc. ta na vispera pa cumpli 100 aña di existencia y ta consisti di 16 Region International reparti full rond mundo. Cada Region tin nan Regional Director cu ta representa nan internacionalmente na e Quota Clubnan corespondiente di nan Region.
Quota International Inc. su meta ta pa contribui cu e desaroyo positivo den comunidad local y internacional.
Quota ta aporta na conscientisa y educa nos comunidad cuminsando for di nos muchanan por medio di nan proyectonan anual den diferente categoria cu ta cay bou di locual cu Quota International Inc. ta dedica na dje y ta lo siguiente: esunnan cu Deficiencia di Oido y Habla ; Esunnan cu ta mas vulnerabel den nos comunidad, esta Hende muhenan den dificultad, muchanan, hobennan y nos grandinan; esunnan desafortuna cu limitacion incapacita social y fisico,; Conscientisacion y desaroyo di formacion intelectual di nos muchanan y hobennan, na nivel local, internacional; y alabes pa contribui y aporta positivamente na e cuido di esunnan cu ta sufri di e enfermedad cancer.
Durante henter aña ta organisa eventonan, seminario y campañanan pa conscientisa comunidad di e problemanan di zonido duro pa oido di hende, y tambe ta ofrece asina diferente oportunidad pa test nan oido gratis durante e siman tan conoci, “Siman di Kibra Silencio, Cuida Bo Oido.”
Quota International Inc. ta gradici henter comunidad di Aruba pa semper sa di coopera, aporta y sostene Quota International di Aruba, cu nan proyectonan pa conhuntamente haci e diferencia positivo pa comunidad y ta desea Gwendeline van Trikt-Rojer hopi exito cu su tarea nobo como Regional Director di Region 10.