Manera cu ya caba George Winterdaal Foundation a bin ta publica durante varios siman caba, un par di siman atras, e comision di GW Foudnation hunto cu muchanan di MIss Teen, tabata na Mary Joan, unda cu nan a haya un tremendo seminario. Nan a haya hopi informacion di e trabao cu Mary Joan ta haci.
E trabao cu Mary Joan ta haci y e placa cu nan ta inverti anualmente den nan proyectonan. E unico manera cu nan ta haya esaki, ta pa medio di un recaudacion di fondo. Pa esaki GW Foundation a bin cu e idea pa haci algo cu MIss Teen. Manera semper nan a bisa, nan ta Beauty With A Purpose. Pa esey nan a acerca Arabella, e comision di Mary Joan Foundation.
Diadomingo awo, lo tin un grandioso evento di recaudacion di fondo, y lo dura henter dia. Lo tin un koffiemorgen, un festival di sopi y naturalmente, e collect ariba caya. Tambe lo bay tin varios actividad pa mucha, unda lo tin un Kidscorner, unda lo tin cotton candy pa e muchanan, trampolin, Dino Jump. Tambe lo bay tin gruponan di baile, artistanan infantil invita pa duna un presentacion. Ta bay ta un dia di famia, yena cu ambiente, hunto cu e famia di Mary Joan Foundation.
E goal simbolico pa e recaudacion di fondo aki lo ta pa yega 10 mil florin. Esun cu no por yega diadomingo, nan lo por yama y haci nan donacion. Y tambe via cuentanan di banco.
Sra. Arabella Reyes, di Mary Joan Foundation ta contento cu e iniciativa aki di GW Foundation. Esaki ta e berdadero nificacion di Beauty With A Purpose. Pa varios aña caba, candidatanan pa Miss Teen ta haya un workshop pa asina conscientisa nan ariba e topico di cancer na pecho. Y e actividad aki ta bin como un bendicion, pa yudanan cu nan trabao. Ta encurasha tur hende pa bin e dia di famia aki, pa asina nan conoce un tiki mas di nan fundacion y nan aporta na loke nan por. Y esunnan cu no por yega, tambe por yama ya cu ta bay tin liña di telefon, 588-9999 of 588- 9966 unda nan por yama pa haci nan donacion. Tambe nan por haci’e via banco, Aruba Bank riba cuenta di banco 2261050290 y CMB 63343903.
Pa un tempo Mary Joan Foundation tabata basta keto, pero nan ta trahando tras di cortina. Pronto nan lo anuncia un proyecto hopi grandi pa cual nan lo mester di hopi fondo. Y loke wordo recauda diadomingo ta e prome stap cu nan lo bin cun’e. E proyecto no ta solamente cu mester realisa, pero e mester tin continuidad, cual ta importante pa comunidad. Pashentnan di cancer ta crece tur rond mundo y Aruba no ta un excepcion.
Por ultimo, Sra. Anabella Reyes ta invita tur hende pa bin pasa un dia di famia diadomingo awo pa pasa un rato contento cerca nan. Bin conoce e fundacion, y asina aporta un poco mas na e fundacion pa nan sigui y pa esaki nan mester di e sosten di comunidad.