Propietario di Gusto Night Club kier a reacciona riba un cantidad grandi di reaccion negativo cu ta circula riba rednan social relaciona cu e establicimento nocturno. Na prome lugar Gusto ta refuta cu na ningun momento niun bartender a biaha for di Hulanda y regresa pia di trabou cu e virus di Covid19. Adicionalmente asina cu nan a haya e informacion cu e prome empleado a test positivo como compania responsabel nan a dicidi di cera nan portanan dialuna mes. Esaki mirando cu e seguridad di nan empleadonan y clientenan ta importante. Gusto ta lamenta cu Gobierno di Aruba ta pone tur e culpa di e brote riba e negoshinan di anochi esta horeca. Durante varios siman e club a opera sin cu ningun empleado tabata contagia. Esaki a cambia ora cu Gobierno di Aruba a dicidi di habri frontera cu net e pais di mas peligroso pa cu e virus di covid19 esta USA. Gusto ta sinti cu esaki tabata un decision pober di Aruba.
Tambe e club ta sinti cu DVG mes no a hasi un bon trabou pa cu e control di tanto local como turista cu a test positivo. Asina por ehempel tin confirmacion cu un taxista cu tabata positivo tabata trahando manera normal y hasta a drenta e establicimento. Asina tambe tin turista cu tabata frecuenta lugarnan mientras cu nan no a haya nan resultado di test ainda.
Gusto ta keda para firme cu nan ta un compania responsabel unda cu tur dia ta tuma e temperatura di cada empleado promer cu cada shift. Tambe despues di a reuni cu departamentonan concerni nan a mantene nan mes na reglanan y protocolnan pa cu e cantidad di persona cu por ta paden.
Mirando e situacion actual di Aruba, Gusto no tin problema cu a dicidi di cera tur bar. Si ta pa Gusto nan no lo haye un problema pa keda cera un luna mes, pero no cu Gobierno ta culpa horeca como e unico responsabel pa e brote.