Durante conferencia di prensa semanal di Partido MEP, parlamentario sr. Guillfred Besaril a trese padilanti cu un biaha mas pueblo ta habri siman indigna pa motibo di e falta di siguridad cu ta reina riba nos pida baranca.
Durante e fin di siman cu ta tras di lomba, atrobe nos comunidad a wordo sacudi pa e fenomeno atraco. Practicamente tur dia tin un atraco y ta di lamenta cu awendia noticia di dia ta, na momento cu no tin atraco! Parlamentario Besaril a declara lo siguiente.
“Partido MEP ta comparti e indignacion di pueblo na momento di tuma nota den medionan di comunicacion cu e ciudadano Span-Ospino, kende a ser aresta algun tempo pasa y a wordo condena pa atraco arma, ta haya un dia liber di su detencion pa pasa “Valentines Day” cu su famia. E persona aki a comete atraconan arma grandi riba nos isla, a pone nos hendenan na peliger, a crea panico den nos cumunidad.
E mesun persona aki a huy e prome oportunidad cu el a haya for di warda di polis. A costa nos isla un cantidad di placa ya cu supuestamente e ta asina peligroso cu pa su mes un siguridad y pa e siguridad di e otro presonan den KIA mester a traslade pa Hulanda. Y asina tin un lista largo cu por sigui menciona.
Anto un persona asina ta bira y haya dispensacion (verlof) pa bay pasa “Valentines Day” cu su famia? Un peticion cu a conta cu aprobacion di e Minister di Husticia himself!
Con esaki por ta posibel? Ki señal Ministerio Publico kier manda cu e accion aki? Ki señal e Minister di Husticia kier manda cu e accion aki?
No ta basta cu pueblo ta sinti su mes bandona y desola riba tereno di husticia?
No ta basta cu tanto falta di convivencia?
No ta basta cu tanto gastamento di placa na accionnan manera manda e persona aki Hulanda pasobra e ta sumamente peligroso y awo algun tempo despues ta dun’e un dispensacion (verlof)?
Pa partido MEP e ta un hecho inacceptabel cu un persona cu un historial criminal asina pisa por bin na remarke pa un tipo di privilegio asina. Ta mas cu claro cu cada persona despues di a cumpli cu su castigo merece un segundo oportunidad pa reintegra den comunidad.
Pero locual ta sosodiendo den e caso aki ta un insulto pa nos comunidad.
A bira ora pa manda un mensahe cla y raspa na e Minister di Husticia y na Gobierno actual cu Aruba no por sigui asina mas. A bira ora pa actua cu man duro y tuma siguridad di nos pais na serio.
Cu tipo di accion manera esaki Ministerio Publico, Minister di Husticia y Gobierno ta mandando e mensahe robes.
Un atracador peligroso cu a trafica cu arma ta wordo premia riba “Valentines Day?” E actonan criminal cu e persona aki a comete riba nos pais ta inaceptabel y por lo tanto e accion di Minister di Husticia pa dun’e un dispensacion (verlof) tambe ta inaceptabel” parlamentario Besaril a termina.