Diabierna 27 di October, 2017 Aruba a conoce un parlamento nobo, despues di e eleccion pa Staten di dia 22 di September ultimo. Parlamentario pa partido MEP, Sr. Guilfred Besaril, a wordo eligi como presidente di Staten. Sr. Besaril ta conta mas di su sentimentonan y su expectativanan cu e cargo y reto nobo aki.
E ta un responsabilidad cu parlamento a pone ariba su persona. Sr. Besaril tin basta aña den parlamento y e ta kere cu ora cu bo tin e confiansa di bo coleganan pa asumi un posicion cu ta asina honorario den nos constitucion, como presidente e ta un coronacion den su carera politico. Parlamento den un fase transitorio a scoge, pa medio di e tres fraccionnan cu ta formando gobierno, pa dos persona stabiel cu por guia e proceso aki. Tin hopi entusiasmo y hopi hende ta puntra constantemente con leu e formacion di e gobierno nobo aki. Bo sa cu den e proceso aki, bo tin e responsabilidad di tene tur hende trankil y tene e proceso, como organisacion pa cana. E escogencia na su momento, tabata pa na un manera cu cabes bon sinta ariba schouder, por guia e organisacion den e proceso aki.
PARLAMENTO # 10
Despues di 16 aña cu tabata tin gobiernonan di un solo partido, awo e reto mas grandi den parlamento ta pa mantene un solo liña. Pueblo tabata hopi cla, cu nan tabata kier un miho checks and balances. E tarea pa e presidente y vice presidente di parlamento ta pa “set the tone” pa cuminsa duna pueblo loke nan a pidi.
Pueblo kier un coalicion y den e cuadro ey nan mester bay traha, y ta e reto di mas grandi pa loke ta presidencia di parlamento.
RETONAN
Sr. Besaril a sigui bisa cu mester laga, despues di e fase di transicion, loke mester laga bon cla, cu tin cierto renobacionnan cu tin cu tuma luga. Na diferente ocasion, colega parlamentario, y awo vice presidente di parlamento, Sr. Andin Bikker, a menciona cu mester caba di independisa staten y bin cu un reglamento di ordo mas actual cu ta duna mas espacio y mas e toolnan cu nan mester pa un miho control. Nan mester set the tone den e direccion ey, pa ora cu tin un presidencia nobo, ora cu e constelacion cambia, pa asina aki nan por continua cu e proceso aki y sigur cumpli cu loke pueblo a pidi. Pueblo a pidi, manera menciona anteriormente, pa un miho checks and balances, y Sr. Besaril ta kere cu den e cuadro ey tin trabao grandi pa haci, aunke ta pa un paar di dia, pero e ta bay ta trabao grandi pa asina ey e presidencia nobo cu asumi e reto, na momento cu nan asumi otro posicionnan den futuro gobernacion. Pueblo a papia y mester scucha pueblo.
CONSTELACION NOBO
Na momento cu tin claridad ariba e futuro gobernacion, si por a sigui Sra. Formado, ainda ta den fase di pone e base pa loke ta un plan di gobernacion nacional. Dicon ta pone hopi enfasis pa un plan di gobernacion nacional, pasobra cu si no tin claridad, ya cu ta trata di tres diferente programa di gobernacion, cual b’a bay eleccion cun’e. Awo tin cu mand’e ariba un solo liña y e mester ta den cuadro di loke pueblo ta exigi di bo persona. Kico ta pasando actualmente ta, cu mester tin claridad pa temanan cu mañan bo por kita for di ariba mesa, pa evita problema. Unabes cu e parti aki di e proceso ta cla, e ora ey por bisa, cuanto ta e cantidad exacto di ministernan, ken nan ta bay ta y e ora ey ta papia di un presidencia y vice presidencia di transicion, ora cu e tres partidonan yega, nan ta bay haya sa kico ta nan futuro politico den parlamento, na e momentonan aki.