Den un solo fin di siman tabata tin dos atraco y esaki ta mustra bon cla cu e maneho di husticia ta riba un mal caminda paso awor ta duna un criminal grandi liber pa bay celebra dia di San Valentino firma pa minister Arthur Dowers segun Sr. Guilfred Besaril ta splica.
Fraccion di MEP ta sumamente indigna na momento cu Minister di Husticia, Arthur Dowers, ta firma pa un atracado califica como peligroso, haya un dia di verlof pa e bay pasa Dia di San Valentino cu su famia. E persona aki, e pueblo a paga basta placa pa e wordo traslada pa Hulanda, ya cu e ta asina peligroso. Un persona cu tabata tin e sistema hudicial den “rep en roer”. Anto e persona aki ta haya un free pass pa bay pasa un dia cu su famia.
Sr. Besaril ta puntra ta con por ta posibel, ta ki señal Ministerio Publico ta mandando cu e accion aki? Ki señal e Minister di Husticia ta manda cu e accion aki? No ta basta cu pueblo ta sinti su mes desola y bandona ariba e tereno aki? No ta basta pa tanto falta di convivencia? No ta basta di gastamento di placa di pueblo den accionnan pa despues ta bira tuma un decision, ya cu ta papia di accion di manda e persona Hulanda, mester paga un cantidad di overtime pa garantisa e persona aki su siguridad y siguridad di e pais aki. Tur e cosnan aki, Sr. Besaril ta puntra, na unda pueblo a keda den tur esaki? E atraconan cu a bin ta sosode den e ultimo temponan aki?
Sr. Guilfred Besaril ta puntra, ta ki ora ta stop? Na ki momento lo bin man duro, y e gobierno aki lo bin dilanti y caminda e Prome Minister ta bisa, cu ta stop di tene man riba cabes di hende cu realmente ta demostra cu nan ta incapaz. Sr. Guilfred Besaril, di partido MEP a sigui bisa, cu si ta pa MEP, September ta pa su mañan mes.
Mester stop e ola di criminalidad, stop e ola di atraco. Y dunando un oportunidad manera nan ta duna e cabayero aki, Ospino Span, e señal robes. Paso despues ta wordo premia, pa ta atracado peligroso, cu tambe ta deal den armanan. En berdad, ora cu e caba di sinta su castigo, e merece un di dos oportunidad. Pero no aworaki. Cosnan asina, segun Sr. Guilfred Besaril, ta inaceptabel.