Ministerio Publico y Cuerpo Policial di Aruba ta informa cu Polis lo rista preventivamente (preventief fouilleren) riba posesion di arma di candela durante Carnaval 63 na Oranjestad.
E autorisacion pa preventief fouilleren ta cubri e siguiente actividadnan Carnavalesco:
1. Parada Grandi di Mucha riba Diadomingo 12 di Februari 2017 di 2’or di atardi te Dialuna 13 di februari 2017 pa 2’or di madruga
2. Hebbe Hebbe Happening riba Diahuebs 16 di februari 2017 di 6’or di atardi te Diabierna 17 di februari 2017 pa 6’or di mainta
3. Aruba’s Grand Lighting Parade ribadiasabra18 di februari 2017 di 6’or di atardi te Diadomingo 19 di februari 2017 pa 6’or di mainta
4. Parada Grandi di Oranjestad riba Diadomingo 26 di februari 2017 di 2’or di atardi pa dialuna 27 di februari 2017 pa 2’or di madruga.
Den cuadro di preventief fouilleren pa posesion di arma, Polis ta autorisa pa para hende na un manera arbitrario, y rista nan na nan paña. Ademas Polis ta autorisa pa busca pa arma den autonan y otro vehiculonan. Polis ta autorisa tambe pa pidi pa tasnan, rugzaknan, cahanan y otro pakinan wordo habri pa rista den nan pa arma.
Ministerio Publico a autorisa Polis pa por haci esaki, y na su turno, Ministerio Publico a pidi e autorisacion aki na Hues- Comisario.