JANAUBA, Brazil- Cuater mucha a muri y tambe un docente despues cu’n guardia di siguridad a tira likido flamable riba nan y peganan na candela, segun autoridadnan.
E homber a cende su mes tambe na candela den un creche den e ciudad aleha di Janauba den e estado Minas Gerais.
Imagennan di video ta mustra un escena caotico pafo, momento cu mayornan a cuminsa yora y drenta den panico ora cu e noticia a bira conoci.
Binti cinco persona, mayoria di na ta muchanan di cuater y cinco aña, a ricibi tratamento den hospitalnan local.
Algun di e pashentnan ainda mester a wordo transporta pa hospitalnan den e capital di e estado, Belo Horizonte.
Mama di un di e victimanan, Juan Miguel Soares Silva di cuater aña, a declara na e corant O Globo cu e tabata considerando pa cambi’e di creche prome cu e atake a sosode.
“Nos lo bay verhuis pa otro bario”, Jane Kelly da Silva Soares a bisa.
“Mi a lanta trempan mainta pa bah’e na e crèche. Ora cu a mi a wak’e atrobe, ya caba e tabata morto na hospital”.
E guardia a wordo identifica door di polis como Damiao Soares dos Santos, di 50 aña. El a muri na hospital a consecuencia di heridanan ricibi.
E motibo di atake ainda ta bou investigacion.
Medionan local a raporta cu e guardia a wordo retira for di trabao despues cu el a regresa di su vacacionnan anual cu problemanan di salud.
El a bay na e creche Gente Inocente pa entrega su certificado medico y despues el a cende e luga na candela, segun O Globo a informa.
Presidente Michel Temer a tweet: “Ta duel mi hopi pa tende di e tragedia aki caminda cu muchanan tabata envolvi. Mi kier expresa mi mas sentido pesame na e famianan”.
Alcalde di Januaba a declara shete dia di duelo.
Fuente: http://www.bbc.com