Control ariba ilegalidad a bira mas streng. Pero tambe tin biaha ta detene un persona cu si tin su permiso, pero e no ta cana cun’e of su peticion ta pega na DIMAS. Minister di Husticia, mr. Andin Bikker, ta amplia.
Guarda Nos Costa tin un reto di capacidad di detencion, pa motibo di e accionnan di Guarda Nos Costa, pero tambe desde 1 di juni cu Cuerpo Policial a haya e autoridad bek, ta basta persona a wordo detecta pa medio di controlnan di Cuerpo Policial. E di dos ta cu ministerio di Husticia a institui un ‘Vreemdelingenketen’, un comision cu ta coordina e comunicacion entre Guarda Nos Costa, DIMAS, Departamento di Labor pa evita cu husto paga pa pecador. Pasobra cu mr. Bikker a asumi su posicion como minister di Husticia y a keda encarga cu DIMAS, tabata tin 6 mil y pico aplicacion den proceso cu no a wordo contesta. Pero den un paar di luna, diligentemente DIMAS a traha ariba nan, te cu el a baha na mil y pico. Pero ainda tin diferente persona cu a wordo nenga y ta bayendo pa permiso 7 pa 8, door cu e paspoort no ta valido, vooral si ta bin for di Venezuela, cu ta dificil pa haya documentonan valido. Ora di control, nan ta aparece como ilegal. Y esey ta di lamenta.
Tambe bo ta haya personanan cu tin hopi aña biba akinan, cu a casa y divorcia. Awo kisas e hendenan aki no sa cu si nan divorcia, mester aplica di nobo pa un permiso. Un persona cu ta di akinan, cu ta contribui na nos economia, mester zorg pa renoba e permiso anualmente, y no warda te ora di control, segun e minister.
Pa loke ta e maneho pa e grupo cu tin nan permiso pega pa un tempo caba, e minister a subraya cu DIMAS tin un sistema, cu a costa pueblo hopi placa. E sistema aki, ora cu mr. Bikker, a zorg pa Guarda Nos Costa pa nan tin tablet cu ta comunica online cu e sistema di SIRSA. Eynan ta haci un assesment, si un persona en berdad ta bisa ken e ta y kico su status ta. Y asina evita cu e ta wordo manda, innecesario, pa e centro di detencion.
E sistema di SIRSA ainda tin su problemanan chikito cun’e, pero e ta bayendo bon asina mes, ya cu a baha e sistema te na mil. Y ora cu SIRSA cuminsa traha manera e mester ta, cu e por keda cla den dos siman. Si ta un renobacion, y si ta un prome permiso, e por wordo haya mas rapido pa loke awo ta e caso.