CARACAS, Venezuela- Despues di a pasa mas di un siman pafo di Venezuela, den un gira cu a inclui destinonan manera Brazil, Paraguay, Argentina y Ecuador, Juan Guaidó dialuna a bolbe bek Venezuela. E regimen di Nicolas Maduro a menasa di arest’e, pero e presidente interino a logra yega sin problema y a wordo ricibi pa un multitud.
Oranan despues di su yegada, el a dicidi di sigui cu su agenda di actividadnan, cu ta busca pa acelera un transicion politico den e pais. E prome paso lo ta un encuentro cu e lo mantene diamars cu funcionarionan estatal.
“Nos lo reuni cu nos empleadonan publico. Nos lo dal e prome paso pa recupera nos burocracia y sigui construi e capacidadnan paden y pafo di e pais cu lo permiti e fin di e usurpacion, un gobierno di transicion y eleccionnan liber”, Guaido a anuncia ariba su cuenta di Twitter diamars mainta.
E ingeniero di 35 aña, reconoci pa varios pais como presidente legitimo di e pais, a yega via e porta principal di Aeropuerto Internacional di Maiquietia, mei mei di un incertidumbre cu su regreso a genera pa a bandona e pais ora cu e tabata tin prohibi pa sali door di un orden hudicial controvertido.
“Venezuela, nos t’ey. Nos ta sigui bay dilanti”, el a bisa den declaracionnan cortico haci, na momento di su yegada. E tabata wordo escolta pa diplomaticonan di nacionnan manera Alemania, Argentina, Spaña y Francia, entre otro, y dilanti di simpatisantenan cu a bin yam’e bon bini.
Desde e aeropuerto, e lider a dirigi su mes pa un concentracion opositor west di Caracas, unda el a anuncia cu dilanti un multitud grandi otro mobilisacion den e pais completo pa diasabra.
“E momento a yega pa bisa ta basta y stop di regimen cu ta oprimiendo nos, di funciona. Diasabra nos lo sigui ariba caya, nos lo mobilisa den buskeda di libertad. Cualkier sacrificio lo ta bale la pena si nos logra e libertad di nos pais. Rumannan: e speransa a nace pa no muri. Nos ta bayendo bon, door cu nos ta bayendo hunto, tur y cu tur”, e opositor a sigura.
“Miembronan di Forsanan Arma: ta evidente cu despues di e menasanan un hende no a cumpli. Nos a bisa esey dia 5 di januari (ora cu el a huramenta e cargo di presidente di e Asamblea Nacional), e cadena di mando ta kibra”, el a expresa durante su discurso na Caracas.
No ta conoci e manera con e hoben politico, cu tabata compaña pa su casa Fabiana Rosales, por a pasa migracion y di unda el a yega, aunke medionan local ta sigura cu el a bin den un vuelo comercial procedente di Panama.