CARACAS, Venezuela — E autoproclama presidente interino di Venezuela, Juan Guaido a anuncia plannan pa modernisa e hunta di directiva di Citgo Petroleum pa asina duna e refineria asedia un liderasgo nobo y kita e presion politico ariba e compania, fuentenan cerca di e lider opositor a bisa S&P Global Platts.
E anuncio lo por bin na cualkier momento, e fuentenan a bisa, en bista di cu Guaido kier agrega momentum tras di su movida pa saca Presidente Nicolas Maduro for di poder despues di e protestanan violento di diaranson cu a laga 13 persona herida.
Citgo ta un subsidiario di e compania petrolero estatal PDVSA, cu base na Merca, cu sucursalnan na Louisiana, Texas and Illinois.
Actual presidente di Citgo Asdrubal Chavez ta prohibi pa drenta Merca despues cu su visa a keda revoca.
Casi mita di e refineria a wordo uza como borg na Rosneft pa asina cubri un prestamo di 1.5 biyon dollar na gobierno Venezolano, y otro acreedornan cu a pone beslag ariba e compania pa pagonan incumpli.
Guaido, e lider di oposicion cu recientemente a wordo nombra presidente di Asamblea Nacional di Venezuela, a declara su mes como e presidente interino di e pais y rapidamente a wordo reconoci pa Merca, Canada y varios otro pais.
Mexico, Rusia y Cuba, sinembargo, a bisa di ta para na banda di Maduro cu a bisa di lo kibra relacionnan diplomatico cu Merca.
Ademas di renoba e liderasgo di Citgo, Guaido ta planea pa introduci un ley di hydrocarburo nobo cu ta establece leynan fiscal flexibel y terminonan contractual pa proyectonan mara na prijsnan di petroleo y e ciclo di inversion di petroleo, como tambe bin cu’n ley anti-corpucion apunta ariba PDVSA, fuentenan a bisa.
Un agencia nobo di hydrocarburos lo wordo crea pa ofrece rondonana di subasta pa proyectonan de gas natural y convencional, petroleo pisa y extra pisa, fuentenan a añadi.
Guaido te ainda no a dicidi ariba un minister di petroleo of un hefe di PDVSA, pero “nan lo ta personanan cu experiencia”, un fuente a sigura.
E actual Minister di Petroleo y director di PDVSA ta Manuel Quevedo, un ex general di brigada di e Forsanan Arma Nacional sin experiencia prome di a wordo nombra den e posicion aki pa Maduro na 2017.
Quevedo, den su capacidad como e representante di Venezuela den e OPEP, actualmente ta ocupa e presidencia rotativo di OPEP pa 2019, cual ta encera dirigi reunionnan, convoca reunionnan extraordinario y fungi como e vocero principal di e organisacion.
CUMPRADO CAUTELOSO
Na mei ultimo, despues di cu Maduro a gana e eleccionnan den un eleccionnan severamente cuestiona, Merca a impone sancionnan cu a daña e habilidad di PDVSA pa refinancia of reestructura e debe grandisimo cu e tin.
Autoridadnan Mericao a bisa cu nan ta prepara pa impone mas sancionnan riba e sector petrolero di Venezuela, incluyendo un embargo completo ariba e importacion Mericano di crudo Venezolano, si e impasse di Maduro cu Guaido escala den mas violencia policial of represion politico.
Fuentenan di mercado ta indica cu e reconocimento di Guaido di parti di Merca como e lider legitimo di Venezuela lo por pone cu refinerianan Mericano lo por stop di cumpra petroleo for di Venezuela, mientras cu Maduro ta na poder.
“Tene relacionnan comercial cu e pais ey ta igual na tene relacionnan comercial cu’n regimen cu no ta wordo reconoci pa e gobierno Mericano y nos no ta sigur si hopi ta e companianan Mericano cu lo tuma e riesgo aki y cu banconan lo financia e risico aki”, Olivier Jakob, analista di Petromatrix a bisa.
Chevron, PBF Energy, Valero y Citgo ta e refinerianan Mericao mas grandi cu ta refina e crudo Venezolano, segun e US Energy Information Administration. Merca ta importa un average di 574,000 b/d di crudo Venezolano na december, sigur un 40% menos cu na juli 2016, ora cu Merca a importa mas di 850.700 b/d, segun e datonan di e US Customs and Border Protection data. Importacion di crudo Venezolano a cay te cu 409.150 b/d na februari 2018, segun e data.
E produccion petrolero di crudo Venezolano a cay na 1.17 miyon b/d na december, segun e ultimo encuesta di S&P Global Platts. Segun pronosticonan e produccion lo sigui cay cu 350,000 b/d de 2019, pero, dependiendo di e sancionnan y otro factornan di riesgo, e lo por cay te cu 800.000 b/d na final di e aña aki, segun e banco di inversion Barclay’s.