CARACAS/WASHINGTON- E ekipo di conseheronan di presidente (interino) di Venezuela, Juan Guaido, ta considerando pa nombra cuater ehecutivo Venezolano den e hunta di directiva transitorio di Citgo, filial di e petrolero estatal PDVSA na Merca. Esaki ta segun informenan di Reuters
E ehecutivonan Luisa Palacios, Angel Olmeta, Luis Urdaneta y Edgar Rincon ta e nombernan cu ta wordo menciona pa forma parti di e hunta transitorio cu pronto lo wordo apunta fuentenan a agrega.
Guaido, reconoci door di Merca como tambe mayoria paisnan Latinoamericano como presidente interino di Venezuela, kier sigura e control di e filial di PDVSA pa financia su gobierno interino.
Nicolas Maduro cu a cuminsa su di dos mandato na januari ultimo, despues di un eleccion cu ta wordo considera como fraudulento, a denuncia Guaido como un marioneta di Merca cu ta buscando pa fomenta un golpi di estado.
E hunta transitorio di Citgo lo ricibi tareanan specifico di e ekipo di Guaido, pa resolve disputanan interno cu tin den e activo den exterior mas importante di e nacion petrolero, segun fuentenan.
Dos ehecutivo halto Mericano cu actualmente ta traha cu Citgo, Art Klein y Rick Esser, tambe lo uni nan mes na e hunta directiva, e informe di Reuters ta sigui bisa.
Merca a impone mas sancion ariba PDVSA dia 28 di januari, cual ta afecta e principal fuente di fondonan den divisa di e gobierno di Maduro.
Door di e sancionnan aki di e gobierno di Donald Trump, clientenan di e compania petrolero na Merca lo mester deposita e entrada di benta di crudo ariba cuentanan bancario cu lo wordo controla pa Guaido.
Den e ultimo simannan e sede di Citgo na Merca a dividi y PDVSA ta busca manera pa retira e ciudadanonan Mericano den su hunta di directiva. Di mes manera, el a purba na bin cu’n strategia legal pa blokia e nombramentonan aki.
Ehecutivonan halto a wordo yama pa Caracas, algun a wordo retira y algunnan leal na Maduro a reaparece diripiente, fuentenan familiarisa cu e operacion di e compania a bisa.