SAN JUAN, Argentina- Organisacionnan contra di abortus ta purba na impedi cu’n hobencita di 11 aña, cu actualmente ta interna den un hospital di San Juan, y cu ta na estado door di violacion, tin acceso na un posibel interupcion di su embaraso.
E menor ta interna den un centro medico di e localidad di Rawson, y lo mester declara pa cu e atake sexual hunto cu su ruman di 5 aña. Esaki lo tuma luga a trabes di e sistema di Camara Gessel, cu ta e dispositivo uza pa realisa e investigacionnan psicologico na menornan di edad den e pais Suramericano.
Autoridadnan local a detene e padrastro di 40 aña, y tambe mama di e victima pa e delito aki. E homber ta wordo acusa door di e victima y e mama ta deteni pa a tapa e violacion, despeus cu cu el a nenga di duna declaracion.
Despues di cu e noticia a bira conoci, segun Cronica, gruponan ‘pro bida’ a cuminsa na difundi comunicacionnan pidiendo apoyo pa impedi pa e menor haya acceso na e Interupcion Legal di Embaraso (ILE), derecho reglamenta den e Codigo Penal di Argentina desde 1921.
E Fiscal di e caso, Claudia Salica, a splica cu e menor p’awo ta den observacion pa specialistanan di e hospital. Pa loke ta e ruman, esaki a wordo traslada temporalmente pa un Centro di Menor te ora cu e situacion familiar wordo resolvi.
E decision awo ta den man di e conseheronan di e menor cu a wordo apunta door di autoridadnan di e Ministerio Publico Fiscal y lo evalua hunto e Ministerio di Salud, con pa procede den e caso aki.