Diasabra mainta Grupo Uni hunto cu MFA Noord a tene un mainta di informacion y entretenimento pa casi 100 hende grandi di e bario. E grupo y invitadonan a haya lectura riba diferente topico incluyendo siguridad, cuminda di tera, etc. Di e manera aki MFA ta sigui duna realse na un di su metanan, cu ta trece ciudadanonan tambe mas cerca di otro pa medio di eventonan cu ta reenforsa lasonan den bario.
Esaki no ta prome biaha cu Grupo Uni ta tene eventonan den MFA Noord, coordinadornan manera Mariana Tromp, ta splica cu e luga ta e espacio, ta bunita y limpi. Ademas den e dianan di calor aki, ta yuda hopi cu tin airco. “Tur hende ta sinta y disfruta,” el a bisa. E y Shelly Tromp ta e coordinadornan di Grupo Uni pa 2016-2017. Nan ta gusta traha cu personal di MFA paso nan ta haya un ayudo enorme den e set up, busca waiters y te hasta cu promocion.
Frank Kelly, fundador di ‘Taki Aruba’ tabata un di e oradornan invita. E empresario hoben ta colecta, mescos cu nos grandinan tabata haci drentando mondi y lama pa trece cuminda riba mesa. E ta nieto di autor di ‘Remedi di Tera’ cu Grupo Uni a yuda publica den pasado. Durante su charla Kelly a splica, por ehempel, con ta traha gel di aloe pa come y con ta cushina cu zeewier. Tambe el a traha croket di cadushi y jus di flor di cayena.
Olivia Figaroa y Lupita Giel a fungi riba e mainta aki como maestronan di ceremonia entreteniendo e grandinan cu wega y premio. Nan tambe ta elogia e beneficionan cu MFA tin pa comunidad y ta invita comunidad di Paradera pa probecha di nan edificio cu recientemente a habri oficialmente. “E ta resulta bon; ambiente ta bon. E ta un rato agradabel y bon aki’den,” Sra. Giel a comenta.