GAZA, Palestina- E movimiento Palestino Hamas diasabra a eligi Ismail Haniyeh pa dirigi su oficina politico, segun e vocero di Hamas, Fawzi Barhoum.
Haniyeh lo reemplaza e veterano lider Khaled Meshaal, cu ta biba na Qatar y a pasa e termino di su mandato net na e momento cu Hamas ta suavisa su posicion pa cu Israel den un documento politico nobo.
E grupo ta mantene un grupo arma considerable na e Strip di Gaza desde cu el a kita e teritorio costero na 2007 for di su rival Fatah, cu sede na Cisjordania y cu a hiba tres guerra caba contra di Israel.
Funcionarionan Israeli no a duna ningun comentario tocante di e eleccion.
Haniyeh, naci na Gaza 54 aña pasa, tabata e prome minister Palestino despues di e victoria di e grupo den e eleccionnan na 2006 y ainda ta eherce e cargo aunke cu el a wordo oficialmente destitui pa e Presidente Palestino y hefe di Fatah, Mahmoud Abbas.
Hamas a bandona su yamada historico pa e destruccion di Israel y a kibra su relacionnan cu Muslim Brotherhood den un posicion nobo anuncia siman pasa desde su oficina principal den exterior na Doha, capital di Qatar.
Den un documento nobo, Hamas ta acepta un estado Palestino di transicion dentro di e fronteranan prome di e guerra di 1967, pero ta sigui nenga di reconoce e derecho di existencia di Israel y ta apoya un lucha arma, mientras cu Abbas ta reconoce Israel y ta busca un acuerdo final di pas basa ariba esaki.
Fuente: Reuters