E Grupo Nucleo ta un plataforma di diferente Gruponan Social cu ta traha na Bienestar di nos Grandinan, esta nos Adultonan Mayor, cu den un reunion general 5 aña pasa, a bin cu e iniciativa pa formalisa esaki den un organisacion. E meta principal ta pa garantisa e derecho cu nos Grandinan mester tin den nos comunidad, conserva y desaroya nan.
Den cuadro di e Dia Internacional di nos Grandinan, 1 di October, kier haci un peticion particular pa pone atencion specificamente ariba nos Grandinan, si ta posibel ariba diasabra 1 di October y riba diadomingo 2 di October.
Grupo Nucleo lo aprecia si por enfatisa ariba e siguiente puntonan cardinal:
• Nan contribucion den pasado pa e desaroyo y progreso di Aruba.
• Nan a planta respet y a inculca e balor y e normanan den nos comunidad.
• Nan ta e modelo pa e hubentud, cu por sigui construi ariba nan experticio y experiencia.
• Nos tur ta sigui disfruta di e frutonan di nan forsa, curashi y nan perseverancia.
• Nos semper mester keda duna nan nos Amor, Cariño y Atencion y nunca lubida nan.
Un felicitacion grandi di Curason pa tur nos Grandinan den nos Comunidad, na unda cu nan por ta, na cas, na hospital, casnan di cuido pa Grandinan y cu nan disfruta di nan Dia Special. Un Bendicion Special y cu nan keda den un bon salud pa asina keda hopi aña mas cu nos.