Awe den oranan di mainta un grupo di persona cu ta pidi pa husticia, a entrega un peticion na Gobernador Alfonso Boekhoudt pa no huramenta Benny Sevinger como Parlamentario. Y a compaa esai cu un list di 5200 firma di ciudadanonan di Aruba.
Grupo Nos kier Husticia diamars mainta tempran a acudi na sede di Gobernador pa haci entrega di un peticion compaña pa un lista di firma.
Vocero di e grupo Jeffrey Schuilenburg a splica cu den apenas algun dia a logra acumula mas cu 5 mil firma y asina cu no a entrega tur e formularionan cu nan a reparti. Tin hende cu no a entrega esaki pasobra no a hya tempo pa yega cerca nan.
Schuilenburg a splica cu diabierna a cuminsa cu e campaña di peticion pa evita cu Benny Sevinger ta wordo huramenta como Parlamentario diahuebs ultimo. E grupo a cana cas pa cas y tambe tin hendenan cu a bini cerca nan. “Nos ta hendenan cu ora tin algo no ta bin, ta sali afo y denuncia esaki,” Schuilenburg a bisa.
Nan ta sinti cu un mancha hopi scur lo cay riba Parlamento si Benny Sevinger huramenta como Parlamentario y esey ta e motibo cu nan a entrega lista di un poco mas cu 5200 firma di personanan cu ta contra esaki. “Nos a pidi Gobernador pa no huramenta Sevinger.”
Diahuebs, dia di huramentacion, nan lo ta para dilanti Parlamento cu nan bandera di Aruba.