Diabierna ultimo dia 21 di Juli a tuma luga e lansamento oficial di e disco compacto di e grupo Melodia cu ta nan recien produccion cu ta hiba e titulo
“Homenahe na Rudy Plaate”. Den presencia di tur esnan cu a forma parti di e produccion aki y tambe otro invitadonan hunto cu prensa a presencia un show unico pa por a lansa e disco aki den presencia di Rudy Plaate tambe.
Na momento cu e ceremonia a cuminsa bou di e musica di e promocional cantica “Wayaka” a cana drenta na bailamento nos reina di cultura cu a trece e disco simbolico grandi pa asina para cu esaki entre e integrantenan di Melodia y Melange caminda e flor di Wayaka a wordo usa pa tira riba e disco.
Na e momento aki via un big screen Rudy Plaate por a presencia tur e show aki for di Corsou y asina despues di a lansa e disco aki na Aruba, e la wordo manda
Simbolicamente pa Rudy Plaate na Corsou y por a mira via e big screen con e ta ricibi esaki den su man y pa despues hiba palabra pa tur esunnan presente aki na Aruba.
Tabata un momento emocional pa Rudy cu tawata den presencia di su famia na momento cu a hiba palabra y tambe mandando e saludo pa henter e pueblo di
Aruba cu a termina cu su palabranan “Aruba mi stimabo”!!
Esaki sigur a ricibi un aplauso grandi di esnan presente cu sigur tawata un momento cu no lo wordo lubida mas pa esnan cu a presencia esaki. Despues cada integrante por a saluda Rudy Plaate via e systema di internet aki pa despues tur presente por a pasa pa brinda pa e ocacion aki. Un anochi placentero a sigui cu cuminda y algo pa refresca te den oranan laat di anochi.
“Homenahe na Rudy Plaate” ta titulo di e produccion cu ta hiba mas cu 15 cantica riba dje tur composicionnan na papiamento di Rudy Plaate.
Un produccion caminda diferente artista a forma parti den canto manera Maybeline Arends – Croes cu su coro Melange, Joselito Arends, Robert Maduro, Rachel Kraaijvanger, Venny Trinidad, Arlene Wever, Hilyann Croes, Richard Dabian, David Dubero, Donald Croes, Charles Croes y tambe grupo Melodia mes. Un variacion total den voz, ritmo, canticanan popular clasico y tambe otronan kizas menos conoci cu ta hasi e produccion aki asina interesante.
Un generacion cu sigur lo a sa di mantene nos canticanan na Papiamento
den un forma unico y crioyo cu sigur nos tur conoce riba nos islanan Aruba, Boneiro y Corsou.Pa tur esnan cu ta interesa den e produccion aki por jama
567- 1664 of 730- 1214 y nos lo por entrega esaki te serka bo. Tambe ta obtenibel cerca tur integrante di Melodia y tambe Melange.
Un pabien ta bai na e grupo Melodia y tambe tur esnan cu a participa den e produccion aki pa trese un bunita produccion asina pa e amantenan di nos dushi musica.