Den un ambiente festivo e popular grupo musical MELODIA lo ta presentando den forma di un concierto cu e nomber “Fiesta den mi Pueblo” pa tur nan fanaticonan y pueblo en general.
Diasabra 24 November venidero pa 7or anochi lo cuminsa e anochi den Aruba New Chinese Club den caya Ritmo unda lo presenta tambe “Rondalla Universo di Aruba” y tambe lo bay tin presentacion di grupo di baile “Gucci Dancers”. Pa cera e anochi lo presenta “MELODIA” cu nan repertorio bon prepara specialmente pa e temporada pa fin di aña cu no tin duda cu esaki lo lanta e publico pa goza di e bon ambiente cu nan dushi ritmo.
Recientemente manera tur aña Melodia un biaha mas a caba di lansa un produccion cu 10 cantica nobo cu musica pa fin di aña y sigur lo
presenta algun di e canticanan aki tambe e anochi di concierto.
Despues cu algun luna pasa a presenta un bunita concierto riba Freewinds cu tawata bon atendi, ta keda e oportunidad un biaha mas pa tur esunnan cu ta desea pa busca carchi na tempo pa bo no keda afo y bin disfruta cu dushi musica di nos mes un artistanan local pa drenta den e dushi temporada di fin di aña.
Nos por a presencia un training di e grupo aki cu mester bisa ta bin sigur bon prepara cu un repertorio bon varia pa un y tur por goza
y mescos cu e grupo “Rondalla Universo di Aruba” cu nan musica cu guitara y tambe den preparacion ja for di algun tempo caba pa presenta nan musica di Pasco.
Pa tur cu ta interesa por busca nan carchi cerca un di e integrantenan y tambe por jama 567-1664 of 730-1214 y e carchi por wordo
entrega te serka bo.