E siman aki un grupo grandi di docentenan a pasa e curso di educacion sexual pa cual aki Sra. Pharetza Bertad – Damon di Biba Amor, di Corsou, a splica con e curso a bay y cu ki meta ta educa nos docentenan
Sra. Bertad Damon ta traha na Ministerio di Salubridad, Medio Ambiente y Naturalesa y ta coordinador di e programa educacion sexual, cu ta hiba e nomber Biba Amor. actualmente e ta na Aruba pa e parti di “kwaliteitsbewaking”, cu ta encera cu e lesnan cu ta wordo duna na e docentenan, Sra. Bertad ta pasa e scolnan pa bishita y ta wak con e materia ta wordo traspasa pa e hobennan.
E ta hopi satisfecho pa loke ta e dunamento di les y cu e docentenan ta hopi bon prepara. E docentenan ta haci nan best pa traspasa e les mas miho posibel. E hoben cu tin un bon informacion ta bon prepara y ta contribui na un desaroyo sexual saludabel.
Educacion sexual ta algo masha importante, y e tipo di lesnan tocante educacion sexual ta hopi importante mes. No ta pa solamente pa bisa, pero ta di importancia, pasobra cu tin casonan caminda cu e mucha cu no a caba di desaroya ainda, no a caba di forma su mes, ta sali na estado cu tur e complicacionnan cu esaki ta bin cun’e. E ta afecta su bida social, su bisa personal.
A cuminsa cu e trayecto aki pa educa e mucha, no pa manda e mucha bay tin relacion sexual, pero mas bien educ’e cu tin otro forma mas responsabel. E realidad ta cu e muchanan ta activo sexualmente y e meta ta pa educanan y duna e informacion corecto. Ta importante pa mayornan duna un man den esaki. Si bo ta sinti como mayor, bo no por papia over di esaki, tin profesionalnan cu por haci esaki. Tin docentenan cu a wordo getrain y conhuntamente por cosecha exito.