Tur Venezolano rond mundo a cuminsa haci protesta na diferente pais y na Aruba tambe esaki a tuma luga. Dialuna mainta un grupo di Venezolano a manifesta dilanti di e consulado di e pais aki, pa cual a papia cu sra. Maria Gabriela, kende ta coordina e manifestacion aki.
El a splica cu nan como Venezolano den exterior, kier duna nan apoyo na henter e pueblo Venezolano cu tur dia ta sali pa lucha, cu tur dia nan ta saliendo pa libera Venezuela. Tambe nan tabata kier rindi un homenahe di tur esnan cu a cay. Entre esnan cu a cay ta un hoben di 28 aña, cu nan a mata na tiro. E ta presidente di e movimiento estudiantil del Tigre, kende a wordo tira dilanti hopi hende y ainda no tin husticia pa e persona aki. Mescos cu e mucha homber aki, nan a mata otro hobennan mas, kendenan a sali tur dia solamente pa pidi tin un Venezuela miho. Tur e hendenan aki ta saliendo solamente pa pidi e Gobierno di Maduro, pa tin un pais miho. Pa e ta un pais cu nan por biba aden. Esey ta loke nan ta pidiendo y loke e Venezolanonan tur dia cu nan ta sali riba caya. Pa nan bay eleccion. Esey ta loke ta pasando na Venezuela. Pa nan libera e prezonan politico.
E grupo di Venezolano cu a protesta ta bay haci varios movimiento na Aruba, bao di e leynan aki, respetando e normanan y con cosnan ta wordo haci akinan. Awe tabata e prome mobilisacion. E obhetivo di e concentracion di awe, ta pa nan ta dilanti e consulado cu e nomber di e hobennan cu a cay y rindi un homenahe y bisa e pueblo di Aruba y na e consul di Venezuela na Aruba, como representante di e Gobierno y tur e Venezolanonan na Aruba, pa por fabor, bisa Nicolas Maduro pa stop cu e represion, permiti pa e Venezolanonan manifesta, mescos cu e grupo aki a haci awe. Asina e Venezolanonan ta sali cu un bandera den man y un borchi, bisando kico nan tin mestert y esey ta loke e grupo aki a haci akinan, pacificamente. Dos ora di protesta pa mundo haya sa kico ta pasando na Venezuela.
E organisacion di e grupo aki a haci un yamado via Whatsapp. No a haci nada masivo pasobra nan tin cu haci’e bao di e leynan di Aruba. Nan kier haci movimientonan mas grandi. Tambe nan ta organizando den otro cos. Nan ta haciendo donacion di alimento, pasobra na Venezuela no tin cuminda, no tin alimento y e grupo aki tin cu reuni pa atrabes di fundacionnan por manda lechi pa e muchanan, pa nan manda remedi pa esnan di tercera edad. E grupo di Venezolano aki tin algun contacto. E grupo a reuni awe pa asina expresa kico nan ta sinti y a dicidi pa concentra dilanti di e consulado pa esey y lo bay sigui haci mas accion.
Maria Gabriela a splica cu nan lo bay concentra riba e tema di donacion. Na Venezuela ta urgi pa ricibi remedi y cuminda, muchanan ta muri pasobra no tin pa alimenta nan y tambe remedi. Nan ta muriendo hopi baby. Adicionalmente tin hopi hende ta fayece, pasobra no tin cuminda. E ora akinan ta duna prioridad pa organisa via e fundacionnan manera ya menciona, pa manda e ayudo humanitario aki pa Venezuela. Venezuela tin mester di ayudo humanitario.