DEN HAAG, Hulanda – Casi mita di e grupo di studiante cu ta studiando na Enschede, Deventer y Zwolle a mustra un interes grandi pa topa cu Minister Plenipotenciario Juan David Yrausquin. E studiantenan a aprecia e manera habri y personal cu minister Yrausquin ta combersa cu nan riba nan estudio y nan bida como studiante na Hulanda. Hopi punto a bin dilanti durante e combersacionnan cu minister Yrausquin a hiba na cada mesa cu e studiantenan.
E studiantenan a tuma nan tempo pa hiba un dialogo constructivo cu Minister Yrausquin pa asina e mandatario por haya mas dato posibel pa haci un analisis di e situacion real cu ta biba bou di e studiantenan. Asina e por bin cu un plan di accion pa segura cu e studiantenan ta termina nan estudio cu exito. Esaki ta un punto cardinal pa minister Yrausquin den su maneho pa brinda mas sosten na nos studiantenan.
Un punto cu a resalta durante di e encuentro ta cu e grupo di studiante ta hopi close cu otro. Esaki ta debi cu e grupo ta chikito, pero tambe cu e laso entre studiante y miembronan di e Plaatselijke Opvangcommissie (POC) ta bastante estrecho. Hopi studiante a duna di conoce cu nan a wordo yuda hopi bon mes pa POC y tambe cu semper cu nan tin un pregunta nan por acerca cualkier miembro di e POC pa contesta of asistencia. Sigur por bisa cu esaki ta bon ehempel con studiantenan entre nan ta yuda otro.
Manera tabata e caso na e otro encuentronan algun studiante a bay live via di Facebook pa conta riba nan experencia como studiante na Hulanda y special tocante di Enschede, Deventer of Zwolle. Hopi tips a keda duna na e muchanan cu ta preparando pa e aña aki bin Hulanda, manera con pa prepara bo mes mas mihor posibel riba un estudio na Hulanda of con pa inscribi bo mes pa tin e siguransa pa haya un camber na tempo.
Na final e studiantenan a bay cas cu un satisfaccion grandi y cu e iniciativa di e minister pa e anochi aki ta uno hopi positivo mes y tur tabata gradicido na e mandatario pa e invitacion.