Prome di September 2018 a introduci un cambio den ley haciendo cu por pasa examen teoretico pa rijbewijs via computer. Pa logra esaki mester a prepara y busca ekipo nobo. Diaranson mainta tabata asina leu cu na MFA Santa Cruz a duna inicio na e examen di rijbewijs via computer. E mainta aki tabata conta cu presencia di minister di Husticia y representantenan di varios rijschool aki na Aruba.
Sr. Rolando Maduro na nomber di tur e Rijschoolnan na Aruba, a gradici tur esunnan cu a kere den e proyecto aki. E proyecto aki ta algo cu ta data di basta aña y Sr. Maduro mes tin casi 14 aña ta pushando pa bin cu’n sistema mas actualisa y mas avansa. Aruba mester bay hunto cu e tecnologia. E problema di pasamento di rijles tabata e tempo di espera. SI un candidato ta inscribi pa e haya un fecha pa e pasa examen, e tardansa tabata 9 luna. Pasobra cu e sistema ta cu e poblacion a crece y e demanda tambe a crece, pero e servicio ta hopi limita y ta di compronde cu KPA no tin suficiente personal. P’esey a keda pusha pa bin cu’n sistema mas moderno, mas actualisa, caminda cu e servicio lo wordo optimalisa.
DI parti di e rijschoolnan, nan ta bezig ta lanta un fundacion y ya caba a acudi na un notario. E intencion ta pa hisa e calidad di duna les na nan clientenan y cu esey lo refleha den e siguridad y comportacion di e chauffeurnan ora cu nan bay participa na trafico, segun Sr. Rolando Maduro.
Tambe a hiba palabra Sr. Thomas Ruiz, cu tambe ta parti di e organisacion ‘in oprichting di rijinstructeurnan’ cu lo representa mayoria rijschool na Aruba. Nan ta contento cu e inicio di e proyecto piloto. E idea ta pa nan por mehora e sistema di duna examen, mehora e calidad tambe di duna les y tambe pa traha centralmente cu otro. Si wak p.e. Corsou, eynan nan ta mas organisa cu Aruba y esey ta e idea cu e rijschoolnan a uni y cera cabes pa nan por organisa esaki mas miho, y tambe coordina entre nan y cu KPA, y hunto cu e otronan cu ta participa pa drecha e sistema pa mehora e calidad di examen y e calidad di servicio na pueblo.
E rijschoolnan tambe ta preparando pa duna rijles na un forma digital. Nan tin mas di 20 representante di rijschoolnan. Y nan ta trahando un tiki mas ordena cu otro, unda cu ta intercambia informacion, un ta yuda otro pa asina tur ta ariba e mesun liña. Unon ta haci forsa. Si algo no ta bay bon den bista di e rijschoolnan, nan por trece esaki dilanti.