BANGKOK, Tailandia- Rescatistanan a haya e 12 muchanan (entre 11 cu 16 aña) y nan coach di futbol cu bida, despues di cu nan tabata perdi durante 10 dianan den un cueba di e provincia di Chiang Rai, noord di Tailandia. Esaki a wordo informa pa ABC News.
E muchanan a wordo haya “sano y salvo” na ongeveer 400 meter di e “Pattaya Beach” , un sala di e cueba di Tham Luang Nang Non, segun Bangkok Post a bisa, citando e gobernador di Chiang Rai, Narongsak Osottanakorn.
Osottanakorn a declara tambe cu e lo hiba cuminda pa nan, y un “dokter cu sa con pa duik” tambe lo bay. “Nos no ta sigur cu nan por come, ya cu nan a perde hopi tempo sin come”, el a constata.
E desaparicion di e muchanan y nan coach a wordo sigui pa un operacion grandi di buskeda y rescate cu a inclui militarnan y ekiponan di Merca, Japon, China y Australia, segun e webiste di noticia Khaosod.
Dia 23 di juni, empleadonan di e parke nacional a haya cerca di e entrada di e cueba, cu ta un luga di interes turistico, un brommer y 11 bicicleta, como tambe varios rugtas, sapatonan di futbol y otro materialnan deportivo cu ta pertenece na un club di futbol local. Mas sigur e grupo a keda pega den e interior di e cueba despues di awaseronan torencial a blokia e acceso.
Fuente:ABC News