Un grupo di hoben cu cara tapa a tuma control over dialuna mainta di e instalacionnan di Escuela Nacional Preparatoria Plantel 8 “Miguel E. Schulz,” den e Ciudad di Mexico, pa exigi un serie di demanda na autoridad di e districto aki, segun e medionan local ta reporta.
E sede educativo ta un di e nuebe scolnan nacional di bachillerato afilia n’e Universidad Nacional Autonoma de Mexico (UNAM) y ta situa riba avenida Lomas de Plateros, colonia Merced Gomez, di e municipio Alvaro Obregon di e capital Mexicano.
Di acuerdo cu informacion suministra pa prensa local, e tumamento di control cu e grupo di persona sin identifica a realisa, ta obedece na “incumplimento” di autoridad di e centro educativo aki encuanto e “mesanan di dialogo” acorda.
E hobennan desconoci a tuma e decision pa cera e sede di e scol pasobra “nan kier pa scucha nan,” e medio local ADN40 a indica riba e red social X. Ademas di esey, e situacion a provoca suspension di les y desaloho di e studiantenan.
E corant El Heraldo a indica cu e hobennan a exigi pa bin cu mehoracion n’e instalacionnan y cu autoridad di UNAM atende e denuncianan p’e supuesto maltrato di parti di e docentenan, como tambe posibel caso di acoso sexual y escolar.
Te asina leu, e situacion ta atendi p’e agentenan di Secretaria de Seguridad Ciudadana de Mexico, cu tabatin e zona cera. E hobennan desconoci a menasa pa no entrega e control di e luga te ora cu autoridad di UNAM responde na nan demandanan, pa cual a premira cu den e proximo oranan a establece e combersacionnan.
November ultimo a sosode un echo similar den e mesun edificio educativo, ora cu algun hoben desconoci cu cara tapa a tuma over e luga y a desaloha e studiantenan, docente y personal administrativo. E momento ey, e manifestantenan a exigi e destitucion di e gerencia di e scol y a demanda mayor siguridad tanto n’e sede como den nan vecindario./
